Համացանց

Ճանապարհային ոստիկանության ֆեյսբուքյան պաշտոնական էջում գրված է. «Հարգելի քաղաքացիներ, հաշվի առնելով այն հանգամանքը, որ վերջին ժամանակներս Երևան քաղաքում ավելացել են հեծանվորդները, ՀՀ ոստիկանության Ճանապարհային ոստիկանությունը համապատասխան ուսումնասիրությունների արդյունքում առաջարկում է Երևան քաղաքի Իսակովի, Արշակունյաց, Տիգրան Մեծ, Խանջյան, Կորյուն, Սայաթ-Նովա, Թումանյան, Ամիրյան, Գրիգոր Լուսավորիչ, Մաշտոց, Բաղրամյան, Աբովյան, Արգիշտի և Սարյան փողոցների 1-ին երթևեկելի գոտու կամ որոշ տեղերում՝ մայթերի մի մասը գծանշումով առանձնացնել և հատկացնել հեծանվային երթուղու համար, որը կկահավորվի նաև կից ներկայացված համապատասխան ճանապարհային նշանով: Խնդրվում է առաջարկությունները մինչև 2018թ. նոյեմբերի 25-ը հասցեագրել info@roadpolice.am էլեկտրոնային փոստին և Ճանապարհային ոստիկանության Ֆեյսբուքյան էջին: ՀՀ ոստկանություն»:

Այս թեմայի մասին ֆեյսբուքյան իր էջում գրառում է կատարել քաղաքական մեկնաբան Հակոբ Բադալյանը. «ՃՈ-ն նախատեսում ա Երևանի որոշ փողոցների երթևեկելի գոտու 1-ին գծում հեծանվաուղու տեղ հատկացնել, թե բա հեծանվորդները շատացել են: Միʹ արեք ձևական բաներ: Դրանով հեծանվորդների պայմաններն ավելի հարմարավետ չեք դարձնելու, փոխարենն ավելորդ խնդիրներ եք առաջացնելու երթևեկության համար: Հեծանվաուղիների հարցը պետք ա դիտարկել Երևանի ճանապարհային երթևեկության համակարգի արդիականացման ամբողջական կոնցեպտում: Վերջ տվեք էդ ոտքի վրա կիսատ-պռատ քայլերին»: