Կոմիտասի անվան կամերային երաժշտությանը տանը կկազմակերպվի համերգ՝ նվիրված Հայաստանի պետական կամերային նվագախմբի հիմնադիր Զարեհ Սահակյանցի 85-ամյակին: Նոյեմբերի 11-ին կայանալիք համերգին հանդես կգա Կամերային նվագախումբը՝ դիրիժոր Հարություն Արզումանյանի ղեկավարությամբ:
Երեկոյի ընթացքում ելույթ կունենան Նիկոլայ Մադոյանը (ջութակ), Խուան Պարդոն (ալտ տրոմբոն/Իսպանիա), Նարեկ Կազազյանը (քանոն), Մարի Լալայանցը (ֆլեյտա), Լիա Հարությունյանը (ֆլեյտա), Մաքսիմ Նովիկովը (ալտ/Ռուսաստան):
Համերգային երեկոյին կհնչեն Գեորգ Վագենզեյլի, Ծովինար Հովհաննիսյանի, Երվանդ Երկանյանի, Էդվարդ Միրզոյանի, Մաքս Ռեգերի ստեղծագործությունները:
Դիրիժոր Հարություն Արզումանյանը փաստում է՝ Զարեհ Սահակյանցին նվիրված համերգին փորձել են ընդգրկել այնպիսի գործեր, որոնք սովորաբար քիչ են հնչում:
Նշենք, որ ջութակահար, դիրիժոր Զարեհ Սահակյանցը 1957-58 թթ. եղել է Մոսկվայի կամերային նվագախմբի ջութակահար: 1958 թ. վերադարձել է Հայաստան և 1960-63 թթ. ստանձնել Հայաստանի պետական սիմֆոնիկ նվագախմբի կոնցերտմայստերի պաշտոնը: 1962-75 թթ. եղել է իր հիմնադրած Հայաստանի կամերային նվագախմբի գեղարվեստական ղեկավարը: