Բելառուսի նախագահ Ալեքսանդր Լուկաշենկոն հայտարարել է, որ անհրաժեշտություն չի տեսնում Բելառուսում ՌԴ ռազմաբազա հիմնելու համար, քանի որ Մինսկն ի վիճակի է իր տարածքում սեփական ուժերով ապահովել կայունությունը, փոխանցում է РИА Новости-ն:
«Հաճախ քննարկվում է Բելառուսի տարածքում ռուսական ռազմաբազայի խնդիրը: Մտացածին է... Մենք Ռուսաստանի հետ ռազմաքաղաքական միության մեջ ենք մտնում, և բացարձակ տարբերություն չկա՝ կլինի ռազմաբազա, թե՝ ոչ: Մենք այդ բազան չենք տեղակայում մեր տարածքում, քանի որ այն մեզ պետք չէ»,- ասել է Լուկաշենկոն Մինսկում ամերիկացի վերլուծաբանների խմբի հետ հանդիպման ժամանակ:
Նրա խոսքով՝ բելառուսցի զինվորականներն «ի վիճակի են առավել արդյունավետ պայքարել ցանկացած ագրեսիայի, Բելառուսի տարածքում ցանկացած հակամարտության դեմ»:
«Այստեղ որևէ ռազմաբազա չկա ոչ թե նրա համար, որ մենք ցանկանում ենք գոհանալ ինչ-որ մեկին... Պարզապես մենք կարող ենք իրականացնել այն գործառույթները, որոնք ընկած են Ռուսաստանի Դաշնության հետ համաձայնագրերի հիմքում»,- հավելել է Բելառուսի նախագահը: