ԱՄՆ նախագահի՝ ազգային անվտանգության հարցերով խորհրդական Ջոն Բոլթոնը, ով պետական այցով գտնվում է Մոսկվայում, հայտնել է՝ ինչպես է Ռուսաստանը զայրացրել ԱՄՆ-ին, փոխանցում է «Эхо Москвы»-ն:
Բոլթոնը հայտարարել է, որ Միացյալ Նահանգների ներքին գործերին միջամտելու Ռուսաստանի ցանկությունն անվստահություն է առաջացնում պաշտոնական Մոսկվայի հանդեպ, և այսուհետ «դա հանդուրժելն անհնար է»:
Բոլթոնն այցի ընթացքում բանակցություններ է վարել ՌԴ բարձրաստիճան պաշտոնյաների հետ, անկալվում է նաև նրա հանդիպումը ՌԴ նախագահի հետ: Բանակցությունների ընթացքում ԱՄՆ նախագահի խորհրդականն ասել է, որ ԱՄՆ-ի նախագահական ընտրություններին Ռուսաստանի միջամտությունն արդյունք չի տվել, սակայն անվստահություն է առաջացրել Մոսկվայի նկատմամբ: ՌԴ անվտանգության խորհրդի քարտուղար Նիկոլայ Պատրուշևի հետ Բոլթոնը քննարկել է Կոնգրեսի ընտրություններին միջամտելու համար Ելենա Հուսյանովային առաջադրված մեղադրանքի հարցը, ինչպես նաև ռուս-ամերիկյան հարաբերություններում առկա լարվածությունը:
Ավելի վաղ ռուսական լրատվամիջոցները հայտնել էին, որ Բոլթոնի այցի ընթացքում Կովկասի իրավիճակը չի քննարկվել: