Պողոս Օղլուկյանը՝ կարմիր գծերի, «անթրաշ» վարորդների և տրանսպորտային այլ խնդիրների մասին
 «Կարմիր գծեր կան, որ երթեկությանը խոչընդոտ են»,- այս մասին այսօր մամուլի ասուլիսի ժամանակ նշեց «Հայաստանում ուղևորափոխադրումների կազմակերպում» ՀԿ նախագահ Պողոս Օղլուկյանը՝ ավելացնելով, որ ինքն անձամբ դեմ է դրանց՝ երթևեկության համար վտանգավորության առումով: Բանախոսն անդրադարձավ նաև տրանսպորտի սակագնի թեմային և նշեց, որ լավ կլիներ՝ վերադառնային 1998-2001 թթ. գործող օրենքին, երբ տրանսպորտը պատկանում էր քաղաքապետարանին: «Այսօր վարորդներն աշխատում են 16-17 ժամ, առավոտյան ժամը 6-ից մինչև գիշերվա 10-11-ը: Պլանը կատարելուց հետո մի ավելորդ երթ են կատարում, որպեսզի մի քիչ գումար էլ տանեն իրենց ընտանիքներին»,- նշեց նա՝ հիշելով նախկին օրենքը, երբ յուրաքանչյուրն իր գույքի հետ վարվում էր ամենօրյա հետևողականությամբ և սրտացավությամբ: «Մարդիկ աշխատում էին 2 վարորդով՝ 8-9 ժամ, բնականաբար հասցնում էին հանգստանալ, իսկ հիմա վազքի մեջ են՝ մեկը մյուսին վազանց է անում, որ ավել մարդ վերցնի»,- նկատեց Պողոս Օղլուկյանն՝ ավելացնելով՝ «դրա համար էլ վարորդներն անթրաշ են, քշելիս՝ աչքները կպնում ա, մեքենաներն էլ՝ անսարք վիճակում են»: «Առաջարկում եմ, որ գոնե փոքր կենտրոնից հանվեն կարմիր գծերը»,- շարունակեց նա՝ հավելելով, որ անհրաժեշտ է գոնե 15 մետր տարածք թողնել նոր նշել կարմիր գծերը: Բանախոսի խոսքով՝ այդ խնդիրն առկա է հատկապես Թումանյան-Աբովյան, Աբովյան-Մոսկովյան խաչմերուկներում, որտեղ Պուշկինի անվան դպրոցն է գտնվում, և երեխաների հոսքը շատ մեծ է: Անդրադառնալով տաքսիների խնդրին, ՀԿ նախագահը նշեց, որ այսօր օնլայն տաքսիներ են դուրս եկել, որոնցից ոչ մեկը լիցենզիա չունի: «Այս հարցով առաջարկ ունեմ տրանսպորտի նախարարությանը. անհրաժեշտ է առաջնահերթ լիցենզավորել և վերահսկել նրանց ֆինանսական եկամուտները: Եկեք հարկերն իջեցնենք այն ձևով, որ ընդունելի լինի վարորդներին, իսկ պետությունն ստանա ամսեկան 200 միլիոն եկամուտ»: |
