ՄԱԿ-ում ԱՄՆ մշտական ներկայացուցիչ Նիքի Հեյլին հեռուստատեսությամբ հայտարարել է Ռուսաստանի դեմ նոր պատժամիջոցների մասին, ինչը զայրացրել է ԱՄՆ նախագահ Դոնալդ Թրամփին. վերջինը դեռ նման որոշում չէր ընդունել, գրում է The New York Times-ը:
Պարբերականը նշում է, որ նման խառնաշփոթի պատճառով հաճախ Վաշինգթոնն իրարանցում է ստեղծում արտասահմանյան պետություններում, որոնք փորձում են հասկանալ ԱՄՆ-ի գործողությունները:
NYT-ն նշում է, որ Թրամփը հեռուստացույց է դիտել կիրակի օրն ու լսել Հեյլիի հայտարարությունն այն մասին, որ ԱՄՆ-ն մտադիր է նոր պատժամիջոցներ սահմանել Ռուսաստանի դեմ: Այդ հայտարարությունը, պարբերականի խոսքով, զայրույթ է առաջացրել ԱՄՆ նախագահի մոտ:
Պարբերականը նաև հայտնում է, որ դա առաջին անգամը չէ, երբ Թրամփը քննադատում է Հեյլիին իր հայտարարությունների համար:
Ամերիկացի պաշտոնյաներից մի քանիսի խոսքով՝ Սպիտակ տունը Հեյլիին չի տեղեկացրել պատժամիջոցային գործընթացում փոփոխությունների մասին, և Թրամփի վարչակազմը հայտարարել է, որ Հեյլին «շատ հեռուն է գնացել հեռուստատեսությունում արված իր հայտարարությունով»:
Երեկ հայտնի էր դարձել, որ Թրամփը հետաձգել է հակառուսական նոր պատժամիջոցները: