ԱՄՆ նախագահ Դոնալդ Թրամփի վարչակազմը մտադիր է Սիրիայում ամերիկյան ռազմական ուժերը փոխարինել արաբական երկրների զինծառայողներով, գրում է Wall Street Journal-ը՝ հղում անելով ամերիկացի պաշտոնյաներին:
Պարբերականի աղբյուրների տեղեկությունների համաձայն՝ Ազգային անվտանգության հարցով Թրամփի խորհրդական Ջոն Բոլթոնը հեռախոսազրույց է ունեցել Եգիպտոսի Ընդհանուր հետախուզության ծառայության ղեկավարի պաշտոնակատարի հետ, որպեսզի տեղեկանա, թե արդյոք Կահիրեն կցանկանա միանալ այդ ծրագրի իրականացմանը:
Պարբերականը նշում է, որ Սպիտակ տունը դիմել է նաև Սաուդյան Արաբիային, Կատարին և ԱՄԷ-ին՝ խնդրելով միլիարդավոր դոլարներ տրամադրել Սիրիայի հյուսիսային հատվածի վերականգնման համար:
Պաշտոնյաների խոսքով՝ երկրի ղեկավարությունը նաև ցանկանում է, որպեսզի արաբական երկրները տարածաշրջան իրենց զինծառայողներին ուղարկեն:
Պարբերականը նշում է, որ նպատակը «Սիրիայում անվտանգության ոլորտում վակուումի առաջացումից խուսափելն է»: