ԱՄՆ կոնգրեսականներն օրինագիծ են ներկայացրել, որով նախատեսվում է նոր պատժամիջոցներ սահմանել Ռուսաստանի դեմ՝ ռուս նախկին հետախույզ Սերգեյ Սկրիպալի և նրա դստեր թունավորման պատճառով, հաղորդում է The Hill-ը:
Օրինագիծը ներկայացրել են Դեմոկրատական կուսակցությունից Ներկայացուցիչների պալատի անդամներ Ջոաքին Կաստրոն և նրա հանրապետական գործընկեր Մայք Թյորները:
«Մեծ Բրիտանիայի տարածքում Սկրիպալների վրա ռուսական կառավարության հարձակումը միջազգային իրավունքի խախտում է, այն ցույց է տալիս Պուտինի ագրեսիան և միջազգային նորմերի արհամարհումը»,- ասվում է կոնգրեսականների համատեղ հայտարարության մեջ:
Օրինագծի համաձայն՝ ԱՄՆ նախագահը կարող է նոր պատժամիջոցներ սահմանելու մասին որոշում ընդունել այն անձանց նկատմամբ, ովքեր ներգրավված են «Սկրիպալի գործին»:
Հիշեցնենք, որ երեկ ԱՄՆ-ն պատժամիջոցային ցանկում էր ներառել ռուս մի շարք օլիգարխների: