Վրաստանի խորհրդարանը վաղը կքննարկի փաստաթուղթը, որն արդեն պայմանականորեն ստացել է «Օթխոզորիա-Թաթունաշվիլիի ցանկ» անվանումը, հաղորդում է Независимая газета-ն:
Ըստ էության, խոսքը Ռուսաստանի և ՌԴ քաղաքացիների նկատմամբ պատժամիջոցների սահմանման մասին է, ովքեր մեղադրվում են «Վրաստանի օկուպացված տարածքներում առևանգումների, խոշտոանգումների, սպանությունների համար»:
Դեռևս հայտնի չէ, թե ով կհայտնվի ցուցակում, և ինչ պատժամիջոցներ կկիրառվեն:
Նշվում է, որ ցանկը դեռևս քննարկվում է խորհրդարանի միջազգային հարաբերությունների հարցերով հանձնաժողովի նիստերում: Հանձնաժողովի ղեկավար Սոֆո Կացարավայի խոսքով՝ խորհրդարանական մեծամասնության և փոքրամասնության միջև քաղաքական խորհրդակցություններն արդեն ավարտվել են, կողմերն սկզբունքային բոլոր հարցերով համաձայնության են եկել: