Բելառուսը չի հանդուրժի Ռուսաստանի կողմից բելառուսական կաթի ներկրման արգելքն ու կպատասխանի այդ քայլին: Այս մասին հայտարարել է Բելառուսի նախագահ Ալեքսանդր Լուկաշենկոն երկրի փոխվարչապետ Միխայիլ Ռուսիի հետ հանդիպման ժամանակ, փոխանցում է БЕЛТА-ն:
«Հատուկ ծառայություններն ինձ տեղեկացրին, որ Նոր Զելանդիայից կամ ինչ-որ այլ տեղից չոր կաթ են բերում: Ավելցուկ է հայտնվել, և նրանք սկսել են մեզ սպասեցնել, դեռևս իրացնում են այդ կաթը բարձր գներով: Այդ իսկ պատճառով նրանց դուր չի գալիս էժան կաթը»,- ասել է Լուկաշենկոն:
Նա հավելել է, որ Բելառուսը հետագայում ևս կշարունակի կաթ վաճառել Ռուսաստանին ցածր գներով:
«Մենք կաթ կմատակարարենք Ռուսաստանին այն գնով, որն անհրաժեշտ ենք համարում, իսկ նրանք թող ռուսաստանցիների համար բարձրացնեն գները, եթե, իհարկե, ռուսները, մոսկվացիները կամ պիտերցիները չեն կշտացել նորզելանդական կաթից»,- նշել է Բելառուսի նախագահը:
Փետրվարի 26-ին «Ռոսսելխոզնադզոր»-ը հայտարարել էր բելառուսական կաթնամթերքի արգելքի մասին: Որպես պատճառ նշված է եղել սպառողների համար մթերքի ոչ անվտանգ լինելը: