ԱՄՆ նախագահ Դոնալդ Թրամփը հայտարարել է, որ Ռուսաստանը Իրանի և սիրիական իշխանությունների հետ մեկտեղ պատասխանատվություն է կրում Սիրիայում մարդասիրական ճգնաժամի համար: Այս մասին նա ասել է Ավստրալիայի վարչապետ Մալքոլմ Թյորնբուլի հետ համատեղ մամուլի ասուլիսի ժամանակ, հաղորդում է CNN-ը:
«Այն, ինչ վերջերս արեցին Ռուսաստանն, Իրանն ու Սիրիան, հումանիտար խայտառակություն է»,- ասել է Թրամփը:
Նրա խոսքով՝ Սիրիայում ամերիկացի զինվորականները գտնվում են ԴԱԻՇ ահաբեկչական խմբավորումից ազատվելու միակ նպատակով:
«Մենք այլ պատճառներ չունենք: Եվ մենք շատ նպատակների ենք հասել: Սակայն այն, ինչ այս կարճ ժամանակահատվածում անում են այդ 3 երկրները, խայտառակություն է»,- նշել է ԱՄՆ նախագահը: