Ինքնաթիռը, որում գտնվել է 60 մարդ, վթարի է ենթարկվել Իրանի Սեմիրոմ քաղաքի մոտակայքում, հայտնում է Tasnim գործակալությունը՝ հղում անելով տեղի արտակարգ իրավիճակների կենտրոնին։
Ինքնաթիռն իրականացնում էր Թեհրան-Յասուջ չվերթը:
Նշվում, է, որ օդանավը պատկանում էր Iran Aseman ավիաընկերությանը և որ ռադարներից անհետացել է մեկնելուց 50 րոպե անց:
Ականատեսները լրագրողներին հայտնել են, որ օդանավը վթարի է ենթարկվել լեռնային հատվածում, երբ փորձում էր արտակարգ վայրէջք կատարել ֆերմաների մոտակայքում: Ավիաընկերության ներկայացուցիչը քիչ առաջ հայտնել է, որ ATR 72-500 ինքնաթիռի բոլոր ուղևորներն ու անձնակազմի անդամները զոհվել են:
ՀՀ ԱԳՆ-ն այս պահին փորձում է ճշտել՝ արդյոք ինքնաթիռում ազգությամբ հայեր կա՞ն, թե՞ ոչ:
Վերջին տվյալներով օդանավում 60 ուղևոր է եղել և անձնակազմի 6 անդամ: Որպես կործանման հիմնական պատճառ՝ նշվում են եղանակային պայմանները: Խիտ մառախուղի պատճառով փրկարարները չեն կարողանում հասնել աղետի վայր: