Գերմանիայի բնապահպանական կազմակերպությունները գերմանացի քաղաքական գործիչներից պահանջել են վերջ դնել «Հյուսիսային հոսք-2» գազատարի նախագծին, գրում է Der Tagesspiegel-ը:
Վայրի բնության համաշխարհային հիմնադրամն ու Գերմանիայի բնության պահպանության միությունը բաց նամակ են ուղարկել Գերմանիայի կանցլեր Անգելա Մերկելին, Քրիստոնեա-սոցիալական միության ղեկավար Հորսթ Զեեհոֆերին և Սոցիալ-դեմոկրատական կուսակցության ղեկավար Մարտին Շուլցին:
Բնապահպանները նշել են, որ «Հյուսիսային հոսք-2»-ը սպառնալիք է ներկայացնում Բալթիկ ծովի բնապահպանական խոցելի համակարգին:
Կազմակերպությունը նամակում ընդգծել է, որ պատրաստվում է դատարանի միջոցով հասնել նախագծի դադարեցմանը:
Նշենք, որ «Հյուսիսային հոսք-2»-ը ենթադրում է Բալթիկ ծովի միջով Ռուսաստանի ափերից մինչև Գերմանիա տարեկան 55 միլիարդ խորանարդ մետր գազ ընդհանուր հզորությամբ գազամուղի 2 ճյուղերի կառուցում:
Նախագծի իրականացմանը դեմ են մի շարք երկրներ: