Միջազգային

Ուկրաինայի գլխավոր դատախազությունը կարծում է, որ Օդեսայի նախկին նահանգապետ Միխայիլ Սաակաշվիլիին պետական հեղաշրջում կազմակերպելու համար 210 հազար դոլար էր պակասում: Այս մասին Սաակաշվիլին ասել է News One հեռուստաալիքի եթերում:

«Այսինքն դուք սահմանել եք, որ Ուկրաինայում կարելի է իշխանափոխություն կատարել 210 հազար դոլարո՞վ: Եվ դուք դա թաքցնո՞ւմ էիք: Լավ է, որ այստեղ տեսախցիկներ կան: Միգուցե մարդիկ փող «գցեն», և այդ գումարը հավաքվի՞»,- Սաակաշվիլիի պնդմամբ՝ ինքն այդպիսի պատասխան է տվել դատախազներին:

Նա հավելել է, որ եթե իշխանափոխությունը, սակագների իջեցումը, որպեսզի մարդիկ չլքեն երկիրը, որպեսզի երկիրը փոխվի և սկսի արագ աճ գրանցել, հենց այդքան արժե, ապա ինքը կարող է այդ գումարը գտնել:

Նշենք, որ Սաակաշվիլիին մինչև 10 տարվա ազատազրկում է սպառնում: Ընդ որում, գլխավոր դատախազ Յուրի Լուցենկոն հայտարարել է, որ պետական հեղաշրջման փորձի և դրա ֆինանսավորման համար կասկածում են ոչ թե քաղաքական գործչին, այլ նրա աջ ձեռքին՝ Սեվերիոն Դանգաձեին: