Աշխարհը քննարկում է Հյուսիսային Կորեայի կողմից բալիստիկ հրթիռի նոր փորձարկումը: Փհենյանում փորձարկումը պատմական հաջողություն են համարել՝ նշելով, որ հրթիռը կարող է թիրախավորել ԱՄՆ-ի ողջ տարածքը:
Հյուսիսկորեական հզոր բալիստիկ հրթիռի արձակումը մեկնաբանել է Չինաստանը: Պեկինը Փհենյանին կոչ է արել ենթարկվել ՄԱԿ-ի Անվտանգության խորհրդի բանաձևի պահանջներին:
Անհանգստություն է հայտնել նաև Ճապոնիան: Երկրի պաշտպանության նախարար Իցունորի Օնոդերան ենթադրել է, որ «Հվասոն-15»-ը կարող է ոչ միայն միջուկային մարտագլխիկ, այլ նաև կենսաբանական և քիմիական զենք կրել: Օնոդերան ընդգծել է, որ հնարավոր միջուկային հարվածի դեպքում երկրի պաշտպանական գերատեսչությունն ու շրջակա միջավայրի պահպանության նախարարությունը կարող են կենսաբանական կամ քիմիական հարձակում նախապատրաստել:
Հարավային Կորեան «Հվասոն-15»-ի արձակումը ՄԱԿ-ի ԱԽ-ի բանաձևերի կոպիտ խախտում է անվանել: Արձակումից մի քանի ժամ անց ԱՄՆ-ի և Հարավային Կորեայի առաջնորդները հեռախոսազրույց են ունեցել: Կողմերը պայմանավորվել են ուժգնացնել Հյուսիսային Կորեայի հարցով համագործակցությունը: ԱՄՆ նախագահ Դոնալդ Թրամփն իր հերթին հայտարարել է, որ Փհենյանը սպառնալիք է ներկայացնում ողջ աշխարհի համար:
Իսկ Փհենյանում նշել են, որ միջուկային ծրագրի մշակումն ու զարգացումն ուղղված են ԱՄՆ-ի միջուկային սպառնալիքներից և միջուկային շանտաժի քաղաքականությունից երկրի ինքնիշխանությունն ու տարածքային ամողջականությունը պաշտպանելուն և ազգի խաղաղ կյանքն ապահովելուն:
Հյուսիսային Կորեայի կառավարության տարածած հայտարարության մեջ ասվում է, որ հրթիռի արձակումը սպառնալիք չի ներկայացնում ցանկացած երկրի կամ տարածաշրջանի համար, քանի դեռ չեն խախտվել Հյուսիսային Կորեայի շահերը: