Սաուդյան Արաբիայի թագաժառանգ արքայազն Մուհամեդ բեն Սալման Ալ Սաուդը նոյեմբերի 26-ին հայտարարել է մահմեդական նոր հակաահաբեկչական կոալիցիայի աշխատանքի մեկնարկի մասին: Կոալիցիայի անդամ է իսլամական 41 պետությունը, հայտնում է Deutsche Welle-ի ռուսական ծառայությունը:
Կոալիցիայի անդամները պատրաստվում են միավորել իրենց «ռազմական, ֆինանսական և քաղաքական ջանքերը»՝ ահաբեկչությանը դիմադրելու համար: Ինչպես նշել է Մուհամեդ բեն Սալմանը, համագործակցելու են նաև նրանց հատուկ ծառայությունները:
Ռազմական դաշինքի մեջ հիմնականում ներառված են սուննի երկրները, դաշինքի մեջ չեն մտնում ո՛չ Իրանը, ո՛չ Իրաքը, ո՛չ Սիրիան:
Արաբական մի շարք երկրների կողմից բոյկոտի ենթարկված Կատարը, որը նախկինում մասնակցում էր ռազմական կոալիցիաներին, նույնպես բացակայում է:
Կոալիցիայի ստեղծման մասին Էր Ռիադում հայտարարել էին դեռ 2015 թվականի դեկտեմբերին: Այդ ժամանակ դրա մեջ էր մտնում 31 երկիր, այդ թվում՝ Կատարը: