Լի Հարվի Օսվալդը ԱՄՆ-ի 35-րդ նախագահ Ջոն Քենեդու սպանությունից 2 ամիս առաջ Մեխիկոյում շփվել է խորհրդային դիվանագետի հետ, ով ՊԱԿ-ի գործակալ է եղել:
Նման տվյալներ են մեջբերվում ԱՄՆ-ի Կենտրոնական հետախուզական վարչության (ԿՀՎ) փաստաթղթերում, հաղորդում է The Sun-ը:
Նշվում է, որ այդ ժամանակաշրջանում ամերիկյան հատուկ ծառայությունները գաղտնալսել են Մեխիկոյում խորհրդային դեսպանատան հեռախոսները:
Փաստաթղթում ասվում է, որ 1963թ. հոկտեմբերի 1-ին Լի Օսվալդը զանգել է Մեխիկոյի դեսպանատուն, հայտնել սեպտեմբերի 28-ին հյուպատոս Վալերի Կոստիկովի հետ հանդիպման մասին և հարցրել զանգին պատասխանած անվտանգության աշխատակցին այն մասին, թե արդյոք որևէ նորություն կա՝ կապված «դեպի Վաշինգթոն հեռագրի» հետ: Անվտանգության աշխատակիցը պատասխանել է, որ հարցումն ուղարկվել է, սակայն դեռևս պատասխան չկա:
Միևնույն ժամանակ նշվում է, որ Կոստիկովը ՊԱԿ-ի գործակալ է եղել: Փաստաթղթում մանրամասն նկարագրվում է նրա արտաքինը, նրա ընտանիքի, ուղևորությունների մասին տեղեկություններ:
Ավելի վաղ հայտնի է դարձել, որ ԱՄՆ-ում գաղտնազերծվել է Ջոն Քենեդու սպանության մասին մոտ 3 հազար փաստաթուղթ, ևս մի քանի հազարը կհրապարակվի մինչև 2018թ. ապրիլ: