«ԱՄՆ-ում գոնե նախագահի մակարդակով տեղի ունեցավ իշխանափոխություն». արձագանքներ` Դոնալդ Թրամփի հաղթանակի վերաբերյալ
Հակառակ բոլոր կանխատեսումների` նոյեմբերի 8-ին ԱՄՆ-ում կայացած նախագահական ընտրություններում հաղթել է հանրապետական թեկնածու Դոնալդ Թրամփն, ով անհրաժեշտ 270 կոլեգիալ ձայների փոխարեն հավաքել է 276 ձայն` դառնալով երկրի 45-րդ նախագահ: |
Նարեկ Գալստյան, քաղաքագետ
Թրամփի հաղթանակն այնքան էլ անակնկալ չէր: Հատկապես վերջին վերլուծությունների արդյունքները վկայում էին այդպիսի արդյունք գրանցելու մասին: ԱՄՆ-ում, ընդհանրապես, այս վերջին նախագահական ընտրությունների արդյունքները բավական հետաքրքիր էին և շուրջ մեկ տարի հետևում էինք, թե ինչ փոփոխություններ են տեղի ունենում ամերիկյան ընտրական դաշտում: Հավանական էր, որ այսպիսի արդյունք կլիներ: |
Արա Պապյան, քաղաքագետ, «Մոդուս վիվենդի» կենտրոնի ղեկավար
Ընտրություններն արտացոլում են ԱՄՆ ժողովրդի քաղաքական ցանկությունները: Որևէ մեկը կասկած չունի, որ դրանք օրինական են եղել, որ դրանք արդար են և այլն, դա միանշանակ է: Ուրիշ բան, որ քաղաքագետների մեծ մասի համար, դատելով նրանց վերլուծություններից, դա անսպասելի էր: |
Ստեփան Գրիգորյան, քաղաքագետ
Թրամփի ընտրվելու հետ կապված բացի բացասականից, նաև դրական կողմեր կան: Թրամփը Պուտինին դրական մեսիջներ է ուղարկել, Պուտինը պատրաստ է նրա հետ համագործակցել, որն այնքան էլ վատ չէ: Ռուս-ամերիկյան հարաբերությունների բարելավումը փոքր երկրների համար շատ կարևոր է, այդ թվում նաև Հայաստանի համար: Չեմ ասում, որ վաղն ամեն ինչ կփոխվի և բարեկամ երկրներ կդառնան Ռուսաստանն ու ԱՄՆ-ն, բայց գոնե հարաբերությունների վատթարացման պրոցեսը կկանգնի: Դոնալդ Թրամփն ԱՄՆ արտաքին քաղաքականության հարցում որոշ փոփոխություններ կիրականացնի՝ մասնավորապես Մերձավոր Արևելքի երկրների, ՆԱՏՕ-ի ֆինանսավորման, Չինաստանի հետ հարաբերությունների կարգավորման ուղղությամբ: ԱՄՆ-ն այն երկիրն է, որի նախագահն ինչքան էլ օրիգինալ մարդ լինի, խաղի կանոնները կհարգի: ԱՄՆ-ում տիրող համակարգն իր ազդեցությունը կունենա Թրամփի քաղաքականության վրա: Այնուամենայնիվ, այո՛, Թրամփը կարող է անսպասելի քայլեր անել՝ օրինակ կապված Մերձավոր Արևելքի հետ: Ես չեմ կարծում, որ նա հրամայի, որ դադարեցնեն ակտիվ միջամտությունը այդ երկրների կյանքում: Չեմ բացառում նաև, որ հակված կլինի Չինաստանի հետ ոչ թե հակադրության գնալ, այլ հակառակը՝ բարելավելու: Սակայն, եվրոպական երկրների համար, Դոնալդ Թրամփի ընտրությունը խնդիր է, քանի որ նա հակված չէ աշխատել ԵՄ-ի հետ: Այստեղ տարբեր խաղացողների համար կան տարբեր վտանգներ՝ Թրամփը առանձնահատուկ վերաբերմունք ունի ՆԱՏՕ-ին, իսկ մենք գիտենք, որ ՆԱՏՕ-ի ֆինանսավորման մեծ մասը ԱՄՆ-ն է տալիս: |
Դավիթ Սանասարյան, «Ժառանգություն» կուսակցության մամուլի խոսնակ
ԱՄՆ նախընտրական ու ընտրական պրոցեսները ցույց տվեցին, որ ԱՄՆ քաղաքական էստաբլիշմենթն իր վատագույն շրջանն է անցնում 21-րդ դարում: Քաղաքացիները հոգնել են ստեղծված իրավիճակից և այս ընտրություններով ամրագրեցին, որ քաղաքական էլիտան բավականին հեռացել է իրենցից: Մեծամասնությունը նախընտրեց ռասիստ ու ֆաշիստ, միլիարդատեր Թրամփին ու դրանով ապտակեց քաղաքական ողջ դաշտին: Իմ համար ԱՄՆ թեկնածուներից հոգեհարազատը Բըրնի Սանդերսն էր, ով չդարձավ դեմոկրատների թեկնածուն: |
Արմեն Դուլյան, քաղաքական մեկնաբան
Շատ զարմանալի է հայաստանցի որոշ հանրապետականների ոգևորությունը ամերիկացի հանրապետականի հաղթանակի կապակցությամբ... Իրողությունն այն է, որ Ամերիկայում գոնե նախագահի մակարդակով տեղի ունեցավ իշխանափոխություն... Տարոսը Հայաստանին... |
Սուրեն Սարգսյան, քաղաքագետ
Հանրապետական թեկնածուն իր արտաքին քաղաքական պատկերացումների մասին բավականին քիչ է խոսել: Ռուսաստանի, Չինաստանի հետ հարաբերությունների մասին է խոսել, ինչպես նաև գլոբալ քաղաքական խնդիրների մասին: Խոսել է նաև Միացյալ Նահանգների բարեկամ երկրների մասին և նրանց մասին, ովքեր իրենց չեն պահում բարեկամին վայել և ԱՄՆ-ի շահերի դեմ որոշակի գործողություններ են կատարում: Դա ասելով Թրամփը նկատի է ունեցել Թուրքիան և Սաուդյան Արաբիան, այսինքն՝ այս առումով, քանի որ Թուրքիայի հարցում որոշակիություն կա տարածաշրջանում, կարող ենք որոշակի բաներ պատկերացնել, սակայն կրկին հստակ պատկերացում չենք կարող ունենալ, թե ինչպիսին կարող է լինել Թրամփի քաղաքականությունը տարածաշրջանում: Դոնալդ Թրամփը աննախատեսելի մարդ է, չնայած ԱՄՆ-ում պետական համակարգը գործում է, ինչի շնորհիվ նախագահը չի կարող միանձնյա որոշումներ կայացնել: |
Շավարշ Քոչարյան, ԱԳ փոխնախարար
ԱՄՆ պետքարտուղարությունը կայուն կառույց է, այդ պատճառով խնդիր չէ, եթե անգամ Թրամփը, որպես թեկնածու, սպառիչ չի խոսել Արցախի հարցի շուրջ: Տեսնենք, թե ինչ քաղաքականություն նա կվարի, երբ ստանձնի պաշտոնը: Անհանգստանալ պետք չէ, բայց հարկավոր է միշտ աշխատել: |
Արամ Կարապետյան, «Նոր ժամանակներ» կուսակցության նախագահ
Եթե նույնիսկ Հայաստանում զարգացում չլինի, ապա տարածաշրջանային զարգացում անպայման կլինի: Հաշվի առնելով Թրամփի լավ հարաբերություններն Ադրբեջանի հետ, բիզնես կապերը և այլն, դժվար է ասել` Հայաստանում փոփոխություններ կլինեն, թե՞ ոչ: Դրա համար էլ, կարծում եմ, որ տեղի կունենա միայն տարածաշրջանային զարգացում և փոփոխություններ կգրանցվեն արտաքին քաղաքականությունում: Նախընտրական քարոզչության ժամանակ պարզ երևաց, որ Թրամփը ինքնամեկուսացվելու նպատակ ունի, կամաց-կամաց կարծես փորձում է ինքնամեկուսացվել: Դոնալդ Թրամփի դեպքում Հայոց ցեղասպանության ճանաչման փաստը կմնա այնպես, ինչպես այսօր է: Մի շարք նահանգներ նորից կճանաչեն Ցեղասպանությունն, այնպես որ այս հարցում էլ փոփոխոթյուն տեղի չի ունենա: |