«Նա ստուգայցով եկավ իր կալվածք ու խոսեց այնպես, ինչպես պայմանավորվել էր իր իրական դաշնակցի հետ». Վլադիմիր Պուտինի` Ծիծեռնակաբերդում ունեցած ելույթին արձագանքում են մտավորականներն ու հասարակությունը
երեքշաբթի, 28 ապրիլի, 2015 թ.
Ապրիլի 24-ին` Ծիծեռնակաբերդում` Հայաստան ժամանած Վլադիմիր Պուտինի ելույթը շատերին անակնկալի բերեց, շատերն էլ այն համարեցին տրամաբանական: Ոմանք այն որակեցին լղոզված ու ոչ լիարժեք, շատերին զայրացրեց, որ Պուտինը հստակորեն չարտասանեց Ցեղասպանություն եզրույթը` հայերին բնաջնջելու դիտանկյունից, այլ խոսեց ընդհանրական` ցեղասպանությունները կանխելու մասին, ոմանք էլ փորձեցին արդարացնել` պատճառաբանելով, արտասանելու կարիք չկար, քանզի նրա ժամանումն արդեն դրա հաստատումն էր: |
Լուսանկար(ներ)
Այս թեման մեկնաբանել են`
Բորիս Նավասարդյան, Երևանի մամուլի ակումբի նախագահ
Պուտինի ելույթը Ծիծեռնակաբերդում իրոք զուսպ էր, ինքը միակն էր այդ օրը Հայաստան այցելած չորս պետությունների ղեկավարներից, ով չօգտագործեց «ցեղասպանություն» բառը: |
Տիգրան Խզմալյան, կինոռեժիսոր
Նա ստուգայցով եկավ իր կալվածք ու խոսեց այնպես, ինչպես պայմանավորվել էր նախապես իր իրական դաշնակից Թուրքիայի հետ: |
Նիկոլայ Թորոսյան, օգտատեր
Թագավորը չի օգտագործում «գենոցիդ» եզրույթը հայերի կատորածի մասին խոսելիս, արտասանում է այն մի անգամ՝ ցեղասպանությունների կանխարգելման կոնվենցիայի մասին հիշատակելուց: Օբաման ևս չի ասում այդ բառը: Փաստացի, երկուսն էլ խույս տվեցին: Բայց մյուս կողմից` Պուտինն ինչից ասես խոսեց՝ իր գալը ՌԴ PR-ի վերածելով: |
Գոռ Սաղաթելյան, օգտատեր
Ապրիլի 24-ը մնաց հետևում, բայց դեռ թարմ են թե՛ դրական էմոցիաների ու հպարտության այն հսկայական լիցքը, որը ստացանք միջոցառումների ընթացքից ու եզրահանգումից, թե՛ քննարկումները՝ այս կամ այն ղեկավարի գալ-չգալու, «ցեղասպանություն» բառն արտասանել-չարտասանելու։ Նախ, երբ հավասարության նշան են դնում Օբամայի ու Պուտինի մեջ՝ «Ցեղասպանություն» բառն օգտագործել-չօգտագործելու առումով, դա ի սկզբանե արդար չէ։ Արդար չէ, որովհետև ի տարբերություն ԱՄՆ-ի, Ռուսաստանը արդեն 20 տարի է՝ պաշտոնապես ճանաչել է Հայոց ցեղասպանությունը և եղել է առաջին երկրներից, որ արել է դա, երկրորդն էլ, ի տարբերություն Օբամայի՝ Պուտինն այնուամենայնիվ թողել էր ամեն ինչ ու եկել էր Երևան՝ մասնակցելու 100-րդ տարելիցին նվիրված միջոցառումներին։ Ու այսքանը թողած, կառչել բառից, էլ չեմ ասում նույն հարթության մեջ դնել մի մարդու հետ, ով ոչինչ չի արել, ոչ էլ նրա երկիրն է ճանաչել, մեղմ ասած չի խոսում օբյեկտիվության մասին։ Ու այս համատեքստում զավեշտալի է լսել ինչ-որ շահեր ունենալու ու ռուս-թուրքական հարաբերությունների մերձեցման առաջնահերթության մասին։ Ինչ խոսք, Ռուսաստանը ձգտում է դրան, բայց երևանյան իր այցի փաստով Պուտինն արդեն իսկ ավելի շատ է վնասել այդ հարաբերություններին, քան արտասանած կամ էլ չարտասանած բառով։ «Ցեղասպանություն» բառը Պուտինի պարագայում զուտ անտուրաժի դեր ուներ, որովհետև անհեմեմատ ավելի կարևոր ու նշանակլից էր նրա ներկայությունը։ |
7614 | 5