Քննարկումներ

28 եվրոպական երկիր ներկայացնող խորհրդարանը, հարգանքի տուրք մատուցելով Ցեղասպանության մեկուկես միլիոն հայ նահատակների հիշատակին, միանում է Հայոց ցեղասպանության 100-րդ տարելիցի ոգեկոչմանը և կոչ անում Եվրոպական հանձնաժողովին և Եվրոպական խորհրդին հետևել իր օրինակին։
Եվրոմիության օրենսդիր մարմինը ցեղասպանությունների կանխարգելումը և մարդկության դեմ հանցագործությունների համար պատշաճ պատիժը համարում է միջազգային հանրության առաջնահերթություն։
Բանաձևը կարևոր ուղերձ է Թուրքիային՝ օգտագործել Հայոց ցեղասպանության 100-րդ տարելիցի առիթը առերեսվելու իր պատմությանը, ճանաչելու Հայոց ցեղասպանությունը և դրանով ճանապարհ հարթելու հայ և թուրք ժողովուրդների իրական հաշտեցման համար։
Այս բանաձևի ընդունմամբ` Եվրոպական խորհրդարանը ևս մեկ անգամ վերահաստատեց իր հավատարմությունը մարդու իրավունքների պաշտպանությանը և համամարդկային արժեքներին:

Բանաձևը դատապարտում է բոլոր տիպի ցեղասպանություններն ու մարդկության դեմ ուղղված հանցագործությունները, կարևորում դրանց կանխարգելմանն ուղղված ջանքերը: Շեշտելով Օսմանյան Կայսրությունում 1.5 միլիոն անմեղ հայերի կոտորածները, իր եղբայրական աջակցությունն է հայտնում հայ ժողովրդին Հայոց Ցեղասպանության 100-ամյա տարելիցին ընդառաջ և կոչ է անում Եվրոպական հանձնաժողովին ու Եվրոպայի խորհրդին միանալ հիշատակի արարողություններին: Փաստաթուղթը հղում անելով 1987-ին Եվրոպական խորհրդարանի կողմից ընդունված «Հայկական հարցի քաղաքական լուծման մասին» բանաձևին, վերահաստատում է իր դիրքորոշումը Հայոց ցեղասպանության եղելության մասին, ընդգծելով, որ Ցեղասպանությունների ժամանակին կանխարգելումն ու արդյունավետ պատասխանատվությունը պետք է լինի միջազգային հանրության առաջնահերթություններից մեկը: Բանաձևում կոչ է արվում Թուրքիային հաշտվել և առերեսվել սեփական պատմության հետ, առանց նախապայմանների կարգավորել հարաբերությունները Հայաստանի հետ` սահմանները բացելու և դիվանագիտական հարաբերություններ ստեղծելու միջոցով:

Եվրոխորհրդարանի երեկվա բանաձևից հետո ավելի դյուրին կլինի Հայոց ցեղասպանության փաստի ճանաչումը Եվրոմիության երկրներում:
Վստահ ենք, որ գալիք օրերի, շաբաթների, կամ ամիսների ընթացքում պիտի ունենանք զանազան բանաձևեր Եվրոպական միության զանազան խորհրդարանների կողմից:

Հայաստանը ԵՏՄ կոչվող թյուրիմացության անդամ է, բայց մեր համար էս կարևոր օրերին մեր կողքին են ու ավելի շատ մեզ աջակցում են եվրոպացիք, կաթոլիկները, քան ԵՏՄ թյուրիմացության անդամ ուղղափառ բելառուսները և ռուսները։ Ղազախների մասին էլ բան չասենք:

Որպես Թուրքիայի նախագահ, ես պաշտպանվելու կարիքը չունեմ և երբեք թույլ չեմ տալու, որ «ցեղասպանություն» բառի ստվերն ընկնի երկրիս վրա: Ինչ որոշում էլ նրանք ընդունեն, միևնույն է` իմ մի ականջից դա կմտնի, մյուսից դուրս կգա: Թուրքիան երբեք չի ընդունի նման ոճրագործության մեղադրանքը:
Մեր երկրում ապրում են հայեր ու նրանք մեր բոլոր բարիքներով են օգտվում, և նրանց մեջ կան ոչ միայն մեր քաղաքացիություն ունեցողները: Մենք կարող էինք նրանց արտաքսել, բայց մենք դա չենք անում:

Եվրոխորհրդարանն իր բանաձևով կոչ է արել Թուրքիայի իշխանություններին՝ առերեսվել սեփական անցյալի հետ, ճանաչել Հայոց ցեղասպանությունը և այդպիսով ուղի հարթել հայ և թուրք ժողովուրդների հաշտեցման համար:
Եվ չնայած Թուրքիան արդեն տարիներ շարունակ փորձում է դառնալ եվրոպական ընտանիքի անդամ՝ այս բանաձևը երկրի իշխանություններն ընդունել են որպես սադրանք: