Քննարկումներ

Հայկական զինուժը պատրաստ է իրավիճակի ցանկացած զարգացման, սակայն լայնամասշտաբ գործողությունների որևէ վտանգ չեմ տեսնում: Հակառակորդի կողմից պարբերաբար ձեռնարկվող նմանատիպ գործողությունները ռազմական առումով անմիտ են, որոնց, ավանդույթի համաձայն, հետևում է իրական կորուստների վերաբերյալ ապատեղեկատվությունը: Իրավիճակը սահմաններում և շփման գծում լիովին վերահսկելի է, հայկական ստորաբաժանումները վստահորեն իրականացնում են իրենց առջև դրված խնդիրները:

Ադրբեջանն ունի ստրատեգիա, այդ մենք չունենք ստրատեգիա: Մենք պիտի հասկանանք, որ սահմանային միջադեպերի և ընդհանրապես հակամարտության վրա ազդող գործոնները բազմաթիվ են, և մենք այս իրավիճակն ունենք, որովհետև մենք մտել ենք մի արատավոր շղթայի մեջ, որտեղ կողմերի և հռետորաբանությունը, և որդեգրած ստրատեգիաները՝ տվյալ պարագայում Ադրբեջանի կողմից ապասառեցնելու ռազմավարությունը, ուղղակի միմյանց լրացնում են, որի պատճառով մենք ունենք այս իրավիճակը:
Տարիներ շարունակ չխոսել այն մասին, որ հակամարտության այս «մատրիցան» և Ռուսաստանի մի քանի միլիարդանոց ռազմատեխնիկական գործարքն Ադրբեջանի հետ ուղղակիորեն գործում են Հայաստանի դեմ, պարզապես անթույլատրելի է:

Ադրբեջանն ապակառուցողական գործողություններ է ձեռնարկում և միտումնավոր դիմում սադրիչ քայլերի, բանակցությունները վտանգի տակ դնելու համար:
Իմ անձնական կարծիքով` սա ուղղակի ապակառուցողական վարք է ոչ միայն Հայաստանի, այլ նաև` միջնորդ կողմերի հանդեպ: Մենք կարող ենք սկսել պատերազմ, կամ լարում ստեղծել, ինչին միջնորդ երկրները դեմ են: Նրանք նշում են, որ միայն խաղաղ ճանապարհով պետք է այս խնդիրը լուծվի: Սահմանին իրավիճակը կարող է փոխվել, եթե միջնորդ երկրներն իրական ճնշում գործադրեն Ադրբեջանի վրա: Մինչդեռ միջնորդներն ինչ-որ խոստումներ են կորզում Ադրբեջանից, սակայն դրանից տասը օր հետո սահմանին կրկին իրավիճակը սրվում է: Կարող են լինել ևʹ տնտեսական ևʹ ռազմական սանկցիաներ, որ Ադրբեջանը փորձում է ապակայունացնել տարածաշրջանը և իր միջազգային պարտավորությունները չի պահպանում:

Հասկանալի է, որ ռազմական գործողությունների ժամանակ, պատերազմական, չհայտարարված պատերազմի, կիսապատերազմական վիճակում, զոհեր կլինեն...երկու կողմից էլ...
Սրանով հանդերձ, մեր երեք զոհերի դիմաց ադրբեջանցիների 14 զոհերի փաստը ինձ բնավ չի մխիթարում:
Ես մխիթարված կլինեի, եթե մեր կողմից զոհեր չլինեին:

Անհանգստությունս շատ մեծ է: Կարևորը, որ սադրանքների նկատմամբ լինել ադեկվատ պատասխաններով և չենթարկվել ոչ մի սադրանքի: Եթե երկու կրակոց է լինում չորսով պատասխանել: Հասկանալի է, որ դա մեր կողմից չի սկսվում: Ես հիմնահարցի լուծման խաղաղ ճանապարհին եմ միայն կողմնակից: Եթե արդեն 25 տարի այս վիճակն է, ժամանակն է, որ ճանաչվի: Ես նորություն չեմ ասում, և սա բոլորիս մտքում է:
Իմ խորին ցավակցություններն ու ափսոսանքն եմ հայտնում զոհվածների հարազատներին:

Զոհերի համար շատ եմ ցավում: Իրատեսական է, որ քանի դեռ այդ հարցը չի լուծվել, շարունակական են լինելու նման լարումները: Իմ խորին համոզմամբ`մեծ տերություններին ձեռնտու չէ այս հարցի լուծումը: Ղարաբաղը խթան է, որ մեծ պետություններն ամեն րոպե կարող են օգտագործել, և ինտրիգ առաջացնել:
Շատ հարցեր կան հետևում… բայց բուն հարցը մնում է չլուծված: Այս ամենը դրսից եկող սադրանքների արդյունք է: Եվ շատ ցավալի է, որ չունենք Տիգրան Մեծի Հայաստանը, որ ամեն բան այլ կերպ լուծել կարողանանք: