«Ամենախելամիտ լուծումը կայացնում է զույգը». ապրել միասի՞ն, թե՞ առանձին
երկուշաբթի, 19 հունվարի, 2015 թ.
Այսօր գրեթե բոլոր երիտասարդ զույգերն ամուսնության առաջին օրից ձգտում են առանձնանալ: Եվ, եթե նախկինում ավագ սերունդը բացասաբար էր արձագանքում, այսօր ծնողներից շատերը նույնիսկ կողմնակից են դրան: Ապրել միասի՞ն, թե՞ առանձին: Հոգեբանների խորհուրդներն ու համաքաղաքացիների կարծիքներն այս ամենի վերաբերյալ տարբեր են: |
Լուսանկար(ներ)
Այս թեման մեկնաբանել են`
Միհրդատ Մադաթյան, հոգեբան
Ասել, որ ծնողների հետ ապրելը լավագույն տարբերակն է, սխալ է, ասել, թե առանձին ապրելն է ճիշտ, դա էլ է սխալ: Երկու տարբերակներն էլ ունեն իրենց առավելություններն ու թերությունները: Եթե նորապսակները մոտ 30-35 տարեկան հասուն մարդիկ են և ցանկանում են ընտանիք կազմել, ծնողներն էլ ակտիվ են և սիրում են նրանց ուղղություն ցույց տալ, այստեղ առանձին ապրելը բնականաբար ավելի ճիշտ է: Իսկ եթե նորապսակները 20-22 տարեկան են, և նոր են սկսում կյանքը տեսնել, ծանոթ չեն ոչ դժվարություններին, ոչ երեխա ունենալու, կենցաղ վարելու խնդիրներին, այստեղ արդեն ծնողների օգնությունը կարևոր է: Պարզապես պետք է պատկերացնել, թե ինչպիսի դեր պետք է խաղան ծնողները: Ծնողը չպետք է լինի թելադրողի կարգավիճակում: Ծնողի դերը խորհուրդ տալն է, և պետք է թողնել, որ երիտասարդներն իրենք ընտրեն` հետևե՞ն խորհրդին, թե՞ ոչ: Պետք չէ պարտադրել խորհուրդը, քանզի կամայական դեպքերում այն կարող է դրական չանդրադառնալ: |
Լիաննա Բալյան, 27 տարեկան
Կարծում եմ` սա այն թեման է, որին հստակ պատասխան տալ հնարավոր չէ: Առանձին կամ միասին ապրելն այսօր մեր երկրում ոչ թե կախված է զույգի ցանկությունից, այլ` նրանց հնարավորությունից: Եթե զույգն ունի ամսական նորմալ եկամուտ ու կարող է իրեն թույլ տալ հոգալ անձնական, բնակարանային, կենցաղային ծախսերը, և եթե ընտանիքում կա լարվածություն երիտասարդների և ծնողների միջև, ապա ինչո՞ւ ոչ, թող ապրեն առանձին: Դա շատ լավ հնարավորություն է միմյանց ավելի լավ ճանաչելու, մտերմանալու, ինքնուրույն դառնալու ընտանիքի` կնոջ կամ ամուսնու, երեխաների հանդեպ պատասխանատվություն կրելու: |
Օվսաննա Մնացականյան, 29 տարեկան
Ես կարծում եմ, որ ամուսնությունից հետո զույգերի առանձին ապրելը, գոնե սկզբնական շրջանում շատ ճիշտ է: Թեպետ կարծում եմ, որ այն զույգերն, ովքեր ավելի վաղ են ամուսնանում՝ մինչև 25 տարեկան պետք է ապրեն ծնողների հետ, որպեսզի ֆինանսական մանր խնդիրները, որոնք առկա են յուրաքանչյուր ընտանիքում, բաժանման պատճառ չդառնան: Իմ դեպքում եղավ այնպես, որ ամուսնությունից առաջ արդեն որոշված էր մեր առանձին ապրելու հարցը, սակայն խոստովանեմ, որ երբեմն, երբ աշխատանքից հոգնած տուն եմ գնում և պետք է զբաղվեմ խոհանոցային ու այլ կենցաղային հարցերով, մտածում եմ միասին ապրելու դրական կողմի մասին: Իսկ ինչ խոսք` զույգերի միմյանց լավ ճանաչելու լավագույն ու թերևս միակ տարբերակը առանձին ապրելն է: Մանր, մունր վեճերն իմ կարծիքով առանձին ապրելու պարագայում ավելի շուտ են հարթվում, ու ամենակարևորը, երրորդ ու չորրորդ անձի, նկատի ունեմ սկեսուր, սկեսրայր, չես մեղադրի վեճի համար: Առանձին ապրելու կարևոր պայմաններց մեկն էլ այն է, որ զույգերն իրենց սերն ավելի անկաշկանդ են արտահայտում, հաճախ ռոմանտիկ ընթրիքներ են կազմակերպում և այլն... Այս բոլոր առավելությունների հետ մեկտեղ կուզենամ նշել, որ ամուր ընտանիքի ամենակարևոր պայմանն ու միակ գրավականը սերն է, միասին ապրեն, թե առանձին... |
Նարինե Մանասյան, 33 տարեկան
Երկու տարբերակն էլ նախընտրում եմ, երկուսն էլ ինձ համար ընդունելի են, ինչպես կստացվի իմ կյանքում, կփորձեմ այդ պայմաններին հարմարվել: Կարծում եմ` երկու դեպքում էլ ևʹ լավ, ևʹ վատ կողմեր կան: |
Արամ Սարգսյան, 25 տարեկան
Մարդու կյանքում ամենապատասխանատու քայլերից մեկն ամուսնությունն է: Ամուսնությունից սկսվում է 2 տարբեր մարդկանց միասնություն, տարբեր բնավորություններով, ովքեր կյանքի հետագա ուղին պետք է հաղթահարեն միասին: Կարծում եմ` ավելի ճիշտ կլնի, որ այդ ուղին հաղթահարեն երկուսով, որովհետև, ցանկացած իրավիճակում 3-րդ անձի միջամտությունը սրում է հարաբերությունները: Իհարկե, չի կարելի կտրվել ծնողներից, նրանց խորհուրդներով հնարավոր են հարցերի խելամիտ լուծումներ, բայց միևնույն է, ամենաճիշտ լուծումը կայացնում է զույգը: Խորհուրդներից պետք է քաղել լավագույնը, բայց ոչ պարտադրել սեփական կարծիքը: Այդ իսկ պատճառով, եթե կա հնարավորություն, ցանկալի է, որ նորաստեղծ ընտանիքն ապրի առանձին: |
Ռուբեն Պողոսյան, հոգեբան
Նորապսակների համար կարևոր պայման պետք է հանդիսանա տղայի ընտանիքում որոշ ժամանակ ապրելը: Կողմնակից եմ, որ մարդաշատ, մեծ ընտանիքներում նորապսակները որոշ ժամանակաշրջան ապրեն, որովհետև այդտեղ որոշ հատկություններ կան, կյանք կա, ինչը չափազանց կարևոր է ապագայում առանձին ապրելու համար: Այդպես կյանքում շատ նուրբ երևույթներ, մարդկային հատկանիշներ են մշակվում. մեծահասակի նկատմամբ վերաբերմունքը, սերնդական կապերի նկատմամբ վերաբերմունքը՝ ով որտեղ է գտնվում, ով ինչպես է իր կեցվածքը ստեղծում, ինչպես է ընտանիքը ամուր և կուռ լինում, և, վերջին հաշվով, եթե մեծ ընտանիք է, ուրեմն ամուր և լավ է ապրում: Նշանակում է՝ ընտանիքի ինչ-որ ավանդական հատկություններ կան, որոնք դարերի ընթացքում մշակվել, բյուրեղացել են, այդ պատճառով էլ այդ ընտանիքն ամուր է մնացել, պահպանվել է, ազգապահպան դեր է ձեռք բերել: Կարծում եմ՝ յուրաքանչյուր նորապսակ ընտանիք պետք է ապրի նմանատիպ ընտանիքում, որպեսզի օրինակ վերցնի մեծերից: Չկա ընտանիք, որտեղ կոնֆլիկտ չլինի: Իսկ ամուր և առողջ ընտանիքի գրավականը սերն է՝ ոչ առանձին, ոչ էլ սկեսուր-սկեսրայրի հետ ապրելը ոչ մի դեր ու նշանակություն չունի: Եթե տվյալ ընտանիքում սեր կա, մնացած ամեն ինչն էլ կլինի, իսկ դժվարություններն էլ կհաղթահարվեն: |
10517 | 1