«Այսօր Հայաստանի Հանրապետության շրջաններում ու մարզերում մշակութային օջախներ գրեթե չկան, եղածներն էլ շատ վատ վիճակում են: Պետք է մշակույթը գնա դեպի մարզեր: Այս առումով 2017-ը բացառիկ տարի ենք հայտարարել: «Մշակութային կանգառ» վերնագրով 426 մշակութային միջոցառում և 100-ից ավելի կինո ցուցադրումներ պետք է լինեն տարբեր մարզերում ու գյուղերում»,- Առաջին ալիքի եթերում ասել է ՀՀ մշակույթի նախարար Արմեն Ամիրյանը:
Նախարարի բնորոշմամբ` Երևանն այսօր մշակութային ագրեսիայի է ենթարկվել: «Մի երեկոյի մեջ մենք 5-6 ընտրություն կարող ենք ունենալ մշակութային միջոցառումների, իսկ մարզերում` 0»,- նշել է նա:
Արմեն Ամիրյանը վստահեցրել է, որ հունվարից մեկնարկող մշակութային ծրագրի շրջանակներում, մարզերում հանդիսատեսն ընդամենը 300 դրամով հնարավորություն կունենա դիտելու Երևանից ժամանած կոլեկտիվների տարբեր ներկայացումներ: Իսկ կինոցուցադրումներն ու համերգները կլինեն բացարձակ անվճար: