Իրադարձություններ

Հայ բեմի Չարլի Չապլին. այսպես են բնորոշել հայ թատրոնի ու կինոյի մեծանուն կատակերգու Կարպ Խաչվանքյանին, ով այսօր կդառնար 94 տարեկան:
     «Շատ էր սիրում երգ լսել, բայց եթե նրան գցեին բանտ և ասեին` «եթե երգես, քեզ բաց կթողնենք», նա այդ չէր կարող անել, որովհետև ոչ մի երգի խոսք չէր հիշում, բայց բավական էր, որ մտներ բեմ, զարմանալի հիշողություն, երգում էր, պարում և մեծ ներշնչանքով»,- այսպես էր հիշում նրան խաղընկերուհին` Սվետլաննա Գրիգորյանը:
     «Դպրոցում սովորել եմ միջակ, վատ, հաճախ եմ «երկուսներ» ստացել: Բայց կներեք, իմ մասին ասում էին … ուսուցիչներս էին ասում` «նա կարող է, բայց չի ուզում. շատ ծույլ է»: Եվ ես, իրո՛ք, չէի ուզում սովորել: Ես ուզում էի միայն թատրոն, ես մտածում էի միայն թատրոնի մասին, իմ միտքն ու ուշքը թատրոնն էր: Եվ, այնուամենայնիվ, դպրոցն ավարտեցի երեքներով, հինգերը՝ ավելի քիչ»,- պատմել է անվանի դերասանը:

     Կարպ Խաչվանքյանն իր բեմական գործունեությունն սկսել է Վրաստանի «Վրացֆիլմ» կինոդերասանական ստուդիայում: Այնուհետև տեղափոխվել է Երևան և դերասանական գործունեությունը շարունակել Հ. Պարոնյանի անվան երաժշտական կոմեդիայի թատրոնում: Խաղացել է դասական գրեթե բոլոր օպերետներում, սակայն առանձնակի վերաբերմունք է ունեցել հայկական օպերետների և երաժշտական կոմեդիաների հանդեպ: Նա փայլուն երգել է, պարել, նվագել տարբեր գործիքներ: Թատրոնում ստեղծել է 13 բեմադրություն, սակայն կյանքում ինքն իրեն միշտ համարել է մռայլ ու անհետաքրքիր մարդ:
     «Կյանքում ես մռայլ, անհետաքրքիր մարդ եմ… Պատկերացրեք` ես նույնիսկ անեկդոտ պատմել չգիտեմ, երբեք սեղանի շուրջ չեմ երգել, արտասանել, խնջույքներին չեմ պարել»: