Հետաքրքիր է

Վերածննդի ժամանակաշրջանի բոլոր կանայք երազել են ունենալ այսպիսի իր, սակայն այն իրենց կարող էին թույլ տալ միայն հարուստները: Ժամանակակից մարդու համար դժվար է հասկանալ, թե սրանք արդուզարդի ինչ մաս են: Իրականում դրանք կոշիկներ են` անհավանական բարձր տակացուի վրա:

Դրանք Վենետիկում առաջին անգամ հայտնվել են 14-րդ դարի վերջին` Միջին Ասիայի ազդեցության տակ: Եվրոպայում այս կոշիկներն ստացել են չոպինի կամ ցոկոլի անունները:

Սկզբում այս կոշիկները եղել են ոչ այնքան նորաձևության պահանջ, որքան կենսական անհրաժեշտություն: Մեծ քաղաքների փողոցներն անտանելի կեղտոտ են եղել, քանի որ, ինչպես հայտնել ենք, անգամ գիշերանոթների պարունակությունն են անմիջապես փողոցում դատարկել: Ուստի, ոտքերն ու թանկարժեք հագուստի փեշերը չաղտոտելու համար բարձրաշխարհիկ կանայք սկսել են հագնել չոպինիներ:

Շատ արագ այս կոշիկները դարձել են գեղեցկության ու հարստության խորհրդանիշ, իսկ մրցակից կանանցից առաջ ընկնելու նպատակով սկսել են պատվիրել ավելի ու ավելի բարձր տակացուներ: Երբեմն դրանց բարձրությունը հասել է 1 մետրի:

     Իհարկե, այսպիսի կոշիկներով քայլելը վտանգավոր է եղել, ուստի կանանց թևանցուկ ուղեկցել են նրանց ծառաները:
     Չոպինիների մասին վերջնականապես մոռացել են 17-րդ դարի սկզբում: Հենց այդ ժամանակ դրանք սկսել են կրել նաև կուրտիզանուհիներն, ու բարձրաշխարհիկ կանայք արագ հրաժարվել են կոշիկի այս տեսակից: