Պենտագոնի ղեկավար Էշթոն Քարտերը Մանամայում կայացած կոնֆերանսի ժամանակ հայտարարել է, որ ԱՄն լրացուցիչ 200 զինվորական կուղարկի Սիրիա՝ Ռաքա քաղաքը ԴԱԻՇ ահաբեկչական կազմակերպության զինյալներից ազատագրելու գործողություններում մասնակցելու համար, փոխանցում է Reuters-ը: «Սիրիա լրացուցիչ ուժերի ուղարկման մասին վերջին որոշումը ևս մեկ կարևոր քայլ է ԴԱԻՇ-ի դեմ պայքարում մեր գործընկերներին աջակցելու համար»,-Քարտերի խոսքերը մեջբերում է ԱՄՆ պաշտպանության նախարարությունը Twitter-ում: Քարտերը նշել է, որ Սիրիա կուղարկվեն նաև հատուկ նշանակության մարզիչներ, խորհրդականներ, ինչպես նաև ականազերծման մասնագետներ: