Գաղտնի փաստաթղթերի հրապարակմամբ զբաղվող WikiLeaks կայքի վերջին բացահայտումները «կարող են շատ տհաճ լինել Թուրքիայի էներգետիկայի նախարար Բերաթ Ալբայրաքի համար, ով երկրի նախագահ Ռեջեփ Էրդողանի փեսան է»,-գրում է ավստրիական Die Presse թերթը:
Թուրք հաքերների Red Hack խումբն ավելի քան 50 հազար էլեկտրոնային նամակ է փոխանցել հարթակին: Նամակագրության մեծ մասը շատ անմեղ է և վերաբերում է կատակներին, բնակարանների որոնմանը և թերթերի հոդվածներին: Այսպես, որոշ նամակների համաձայն, Ալբայրաքն, ամենայն հավանականությամբ, «միացել է այն նախաձեռնությանը, որն առաջարկում էր դատել իր աներ Էրդողանին` որպես ռազմական հանցագործի»:
Բայց ավելի սկանդալային են մնացած 30 նամակները, որոնք հաստատում են Ալբայրաքի դերը Powertrans ընկերության մեջ և, համապատասխանաբար, Էրդողանի կապը նավթային բիզնեսի հետ:
Powertrans-ը, ընդգծում է թերթը, Թուրքիայի միակ ընկերությունն է, որը կարող է նավթ ներկրել և արտահանել: Ընկերության ստեղծման մասին որոշումը կայացվել է Թուրքիայի կառավարության կողմից 2011թ.: Գույքային հարաբերություններն անհայտ են, քանի որ հետքերը կորչում են Սինգապուրում և Բրիտանական Վիրջինյան կղզիներում: Ավելի վաղ արված բացահայտումների համաձայն` նավթային ընկերության մասնաբաժինը պատկանում էր Çalık Holding-ին, որի ղեկավարը երկար ժամանակ հենց Ալբայրաքն էր:
Հրապարակված նամակագրությունում Ալբայրաքը կադրերի տնօրենի հետ միասին քննարկել է պաշտոնների բաշխումը Powertrans-ում և աշխատավարձերի հարցը: Հենց Ալբայրաքն է հավանություն տվել բոլոր առաջարկներին և զբաղվել նավթային ընկերության կազմակերպչական հարցերի լուծմամբ: Իր իրավապաշտպանի հետ նամակագրության մեջ Ալբայրաքը քննարկել է, թե ինչպես է պետք մեկնաբանել մեղադրանքները նավթային ընկերության հետ կապված: