Դերասան Հրանտ Թոխատյանն այսօր լրագրողների հետ զրույցում տեղեկացրել է, որ Երևանի ավագանու անդամ է դարձել, որ կարողանա հասարակությանը հուզող հարցերը լուծել. «Ավագանու անդամ լինելն էլ չի օգնում, այնտեղ էլ քո ձայնը բարբառո է, տեղ չի հասնում: Իշխանությունն ինչպես ուզում, այնպես էլ անում է»,- ասել է Թոխատյանը: Նրա խոսքով` այսօր պետք է այնպես անել, որ յուրաքանչուրի ձայնը տեղ հասնի. «Իմ ձայնը եղել է բեմը, ներկայացումը: Քաղաքացին պետք է տեր լինի իր ձայնին: ՀՀ-ում այսքան տարիների ընթացքում չի ձևավորվել նորմալ ընդդիմություն, որպեսզի առաջնորդեր ժողովրդին: Միշտ ինչ-որ բան խանգարել է, արդյունքում տուժել է ժողովուրդը»,- ասել է Թոխատյանը: Նրա խոսքով` մշակութային մի խումբ գործիչներ նախաձեռնությամբ են հանդես եկել` իշխանություններին օգնելու. «Իշխանություններն ի՞նչ են ասում, որ եկեք նորմալ ընտրություններ անենք, մենք էլ այդպես ենք վարվում, նրանց կոչին ենք միանում և փորձելու ենք արդարությունը վերականգնել»: