Կինոռեժիսոր Ռուբեն Գևորգյանցը շատ է սիրում կյանքը, մահից չի վախենում, փոխարենը վախենում է հիվանդություններից: Եթե նորից ապրելու հնարավորություն ստանար, կապրեր նույն կերպ, ինչպես ապրել է, ոչինչ չէր փոխի:
Ռուբեն Գևորգյանցն, ով այսօր դարձավ 71 տարեկան, հաճախ է հիշում Փարաջանովի հետևյալ խոսքերը` «անհնար է մեկին դարձնել ռեժիսոր, դա պետք է ներսից գա»: Նրա համոզմամբ` արվեստ չես կարող սովորեցնել, կարող ես սովորեցնել ինֆորմացիա` արվեստի մասին:
«Ինձ համար կինո արդեն վաղուց չկա: Կինոն մահացել է: Այն մահացել է ոչ միայն Հայաստանում, ամեն տեղ: Որովհետև նոր բան չկա ասելու: Արվեստը նախ և առաջ պետք է բարի բան ասի, հույս ներշնչի, օգնի մարդուն ապրելու, այսօր դժբախտաբար, ասելիք չկա»,- հարցազրույցներից մեկի ժամանակ ասել է Ռուբեն Գևորգյանցը:
Ռուբեն Գևորգյանցը` Սերգեյ Փարաջանովի հետ
Նա նկարահանել է շուրջ 70 ֆիլմ, որոնցից են` «Մի լուսանկարի հետքերով», «Ներշնչանք», «Ամենալավ մարդը», «Սպիտակ ոսկոր» «Փարաջանով` վերջին կոլաժ» և այլն: Կինոռեժիսորը նաև հեղինակել է երեք գիրք` «Անձրևների ժամանակը», «Արդարացման ժամանակը», «Ժամանակ չկա»:
1989-ից փաստավավերագրական ֆիլմերի «Հայկ» կինոստուդիայի տնօրենն ու գեղարվեստական ղեկավարն է, իսկ 2005թ-ից` Հայաստանի կինեմատոգրաֆիստների միության նախագահը: