Ֆրանսիայի արտգործնախարար Ժան Մարկ Էյրոն պահանջել է ՄԱԿ-ի Անվտանգության խորհրդի արտահերթ նիստ հրավիրել` Հալեպում տիրող իրադրության քննարկման համար, փոխանցում է BBC-ին: Նշենք, որ այնտեղ արդեն մի քանի օր է` դաժան մարտեր են ընթանում:
«Այժմ առավել, քան երբևէ, անհրաժեշտ է միջոցներ ձեռնարկել ռազմական գործողությունների դադարեցման և մարդասիրական օգնության կազմակերպման համար»,- հայտարարել է Էյրոն:
Հիշեցնենք, որ Սիրիայի կառավարական զորքերը հայտարարել են, թե իրենց հաջողվել է աշխարհազորայիններից վերցնել Հալեպի տարածքի ավելի քան մեկ երրորդ մասը:
Հալեպում կառավարական զորքերի ու դաշնակիցների կողմից զանգվածային ռազմագործողություններն սկսվել են ավելի քան 2 շաբաթ առաջ:
Հարկ է նշել, որ ՄԱԿ-ի մանկական հիմնադրամի` UNICEF-ի տվյալներով` Սիրիայի պաշարված քաղաքներում ապրում է մոտ կես միլիոն երեխա։ Ավելի քան 100.000 երեխա գտնվում է Արևելյան Հալեպում։