ԱՄՆ Ներկայացուցիչների պալատը հավանության է արժանացրել Սիրիայի, Ռուսաստանի և Իրանի դեմ «ռազմական հանցագործությունների» և «մարդկության դեմ հանցագործությունների» համար պատժամիջոցների մասին օրինագիծը, հաղորդում է Reuters-ը:
Հիմա այն պետք է հավանության արժանացնեն Սենատն ու ԱՄՆ նախագահը:
Գործակալության տվյալներով` դեռևս տեղեկատվություն չկա, թե երբ կկայանա օրինագծի դիտարկումը Սենատում:
Հոկտեմբերին ԱՄՆ պետքարտուղար Ջոն Քերին և Մեծ Բրիտանիայի արտաքին գործերի նախարար Բորիս Ջոնսոնը հայտարարել էին, որ քննարկվում է Ռուսաստանի դեմ սիրիական հակամարտության պատճառով պատժամիջոցների սահմանումը: Քննարկվել է նաև սիրիական կառավարության դեմ պատժամիջոցների սահմանումը:
ՌԴ արտգործնախարարի տեղակալ Սերգեյ Ռյաբկովն այդ հայտարարությանն ի պատասխան նշել էր, որ ցանկացած թշնամական գործողություն Ռուսաստանի հանդեպ անպատասխան չի մնում: