Իրադարձություններ

ՀՀ նախագահի նստավայրում կայացել է Տեղեկատվական տեխնոլոգիաների (ՏՏ) ոլորտում համաշխարհային ներդրման համար ՀՀ նախագահի 2016թ. մրցանակաբաշխության հաղթողի ներկայացման մամուլի ասուլիսը: Ասուլիսի բանախոսներն էին միջազգային մրցանակաբաշխության կազմակերպչական կոմիտեի նախագահ, ՀՀ նախագահի աշխատակազմի ղեկավար Արմեն Գևորգյանը, մրցանակի հովանավոր ընկերության՝ ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, մրցանակաբաշխության գործադիր խորհրդի նախագահ Հովիկ Մուսայելյանը և մրցանակաբաշխության ընտրող հանձնաժողովի ներկայացուցիչ, «Վիասֆեր Ինթերնեշնլ» ընկերության գլխավոր գործադիր տնօրեն և նախագահ Թոնի Մորոյանը:

Ինչպես հայտարարվեց մամուլի ասուլիսի ընթացքում՝ ՏՏ ոլորտում համաշխարհային ներդրման համար ՀՀ նախագահի մրցանակը այս տարի շնորհվելու է դեյտագրամի հայտագործող և «Open-Root» կազմակերպության հիմնադիր Լուի Պուզանին, ով նաև համարվում է համացանցի հիմնադիր հայրերից մեկը: ՀՀ նախագահի ամենամյա մրցանակը շնորհվում է համաշխարհային ՏՏ ոլորտում բացառիկ ներդրումներ կատարած հեղինակավոր անհատի, ում ներդրումները ՏՏ ոլորտում բերել կամ բերում են հեղափոխական կամ համանման բնույթ ունեցող զարգացումների, որոնք դրականորեն են անդրադարձել կամ ներուժ ունեն դրականորեն անդրադառնալու պատմության ընթացքի վրա:

Բանախոսներն ընդգծել են ՀՀ նախագահի մրցանակի կարևոր դերը Հայաստանում Տեղեկատվական ու հեռահաղորդակցության տեխնլոգիաների (ՏՀՏ) ոլորտի զարգացման և միջազգային հարթակներում երկրի հեղինակության բարձրացման գործում: Մրցանակաբաշխությունը Հայաստանում անցկացվում է յոթերորդ տարին անընդմեջ՝ հյուրընկալելով ՏՏ ոլորտում բացառիկ ներդրումներ կատարած մասնագետների: նախորդ տարիների մրցանակակիրներն են՝ «Ինտել» կորպորացիայի տնօրենների խորհրդի նախկին նախագահ Քրեյգ Բարրեթը (2010թ.), «Էփլ Քոմփյութեր» կորպորացիայի համահիմնադիր Սթիվ Վոզնյակը (2011թ.), «Սինապտիկս» ընկերության պատվավոր նախագահ Ֆեդերիկո Ֆաջինը (2012թ.), Կիսահաղորդիչային արդյունաբերության մասնագետների միության և «Թեքնո վիժն» ընկերության նախագահ Ցուգիո Մակիմոտոն (2013թ.), «Cisco» ընկերության տեխնոլոգիական խմբի ավագ փոխնախագահ, «Insieme» բիզնես բաժնի գլխավոր տնօրեն Մարիո Մացցոլան (2014թ.) և «Կասպերսկու լաբորատորիայի» գործադիր տնօրեն Եվգենի Կասպերսկին (2015թ.):