Իրադարձություններ

     Երևանի վարչական դատարանը մերժել է Սևանի քաղաքապետի թեկնածու Ռուդիկ Ղուկասյանի հայցը` հոկտեմբերի 2-ին տեղի ունեցած ՏԻՄ ընտրությունների արդյունքներն անվավեր ճանաչելու մասով: «Ակնկալիք չունեինք, որ հայցադիմումը կբավարարվեր, քանի որ չունեինք բոլոր ընտրատեղամասերում տեղի ունեցած ընտրախախտումների փաստերը»,- ասաց Ղուկասյանի փաստաբան Վրեժ Խաչիկյանը:
     Ավելի վաղ տեղեկացրել էինք, որ հոկտեմբերի 2-ին Սևանում քաղաքապետի ընտրությունների ժամանակ, Ռուդիկ Ղուկասյանը հայտարարել էր, որ իր հիմնական մրցակից՝ «Սևան» ազգային պարկ» ՊՈԱԿ-ի տնօրենի տեղակալ Սարգիս Մուրադյանը, քաղաքաքացիական հագուստով ոստիկանների ուղեկցությամբ, ընտրակաշառք է բաժանում Սևանում: Հայցի հիմքում դատարան են ներկայացվել «իրեղեն» ապացույց հանդիսացող տեսագրություններ, որոնք ֆիքսել են ընտրակաշառք բաժանելը։ Նշենք, որ դատական նիստի ընթացքում քաղաքապետ Սարգիս Մուրադյանի պաշտպանը կարծիք է հայտնել, որ բերված ապացույցները բավարար հիմք չեն կարող հանդիսանալ, որպեսզի ընտրությունների արդյունքները չեղարկվեն: