Համացանց

     Ինչպես արդեն տեղեկացրել ենք, Վանաձոր համայնքի ավագանու անդամ Արկադի Փելեշյանին՝ հոգևոր հովիվ Ռաֆայել Գրիգորյանին ծեծելու համար մեղադրանք է առաջադրվել ՀՀ քրեական օրենսգրքի 118-րդ հոդվածով:
    
     Իրավապաշտպան Արթուր Սաքունցը ֆեյսբուքյան իր էջում անդրադառնալով առաջադրված մեղադրանքին գրել է.
    
     «Ուղղակի հարց այդ քննիչ, դատախազ կոչեցյալներին. մտնեն ձեր տուն, խմբով, առնվազն 15 հոգով, կնոջդ, անչափահաս թոռնուհուդ, հավատակից մարդկանց ներկայությամբ տանեն առանձին սենյակ 12-15 րոպե ենթարկեն ծեծի։ Փորձես փախչել, ազատվել այդ բռնությունից, չթողնեն, հետ մղեն, ավելին՝ օգնության եկողներին էլ չթողնեն օգնության գալ, թոռնուհուդ նկատմամբ էլ սպառնալիք տեղան, թողնեն գնան ու 118 հոդվա՞ծ՝ ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետևանքներ, պատժվում է տուգանքով՝ նվազագույն աշխատավարձի առավելագույնը հարյուրապատիկի չափով, կամ կալանքով՝ առավելագույնը երկու ամիս ժամկետով։
    
     Եվ ոչ թե 119 հոդված՝ «Անձին դիտավորությամբ ֆիզիկական ուժեղ ցավ կամ հոգեկան ուժեղ տառապանք պատճառելը, եթե դա չի առաջացրել սույն օրենսգրքի 112-րդ և 113-րդ հոդվածներով նախատեսված հետևանքները, և եթե բացակայում են սույն օրենսգրքի 309.1-ին հոդվածով նախատեսված հանցագործության հատկանիշները, պատժվում է ազատազրկմամբ՝ առավելագույնը երեք տարի ժամկետով:
    
     Նույն գործողությունները, որոնք կատարվել են՝
    
     1) երկու կամ ավելի անձանց նկատմամբ,
     3) անչափահասի կամ հանցավորից նյութական կամ այլ կախվածություն ունեցող անձի, ինչպես նաև առևանգված կամ որպես պատանդ վերցված անձի նկատմամբ,
     5) մի խումբ անձանց կամ կազմակերպված խմբի կողմից,
     6) առանձին դաժանությամբ,
    
     պատժվում են ազատազրկմամբ՝ 3-7 տարի ժամկետով»:
    
     Ինչպե՞ս անվանենք: Ուրեմն արժե, որ ձեր տներն էլ մտնեն և ձեզ էլ ենթարկեն նման ահավոր նվաստացման ու ֆիզիկական ու հոգեբանական բռնության, բայց հետո ծպտուն չհանեք ու սսկված կմնաք, եթե նման որակում տրվի ձեր նկատմամբ իրականացված հենց նույնաբնույթ գործողությանը: Հասկացա՞ք»։