Միջազգային

ՌԴ Դաշնային խորհուրդը լիագումար նիստում վավերացրել է Սիրիայում ռուսական ավիաբազայի անժամկետ տեղակայման մասին համաձայնագիրը, հայտնում է ТАСС-ը:
    
     Փաստաթուղթն ստորագրվել է 2015 թվականի օգոստոսի 26-ին Դամասկոսում, իսկ մոտ մեկ տարի անց՝ 2016 թվականի օգոստոսին, ՌԴ նախագահն այն ներկայացրել է խորհրդարան:
    
     Համաձայնագրում նշվում է, որ ռուսական ավիացիոն խումբը տեղակայվում է երկրի տարածքում սիրիական կողմի խնդրանքով, Լաթաքիա շրջանի Հմեյմիմ ավիաբազայում, անժամկետ և անվճար հիմունքներով:
    
     Պետդուման միաձայն վավերացրել էր համաձայնագիրը հոկտեմբերի 7-ին:
    
     Փաստաթղթի համաձայն՝ ՌԴ ավիացիոն խմբի կիրառումն իրականացվում է դրա հրամանատարի որոշման համաձայն՝ սիրիական իշխանությունների ներկայացուցիչների հետ համաձայնեցմամբ: