Ինդոնեզիայի Արևելյան Ճավա կղզու Իջեն հրաբխային շղթայի Կավահ Իջեն հրաբուխն արտասովոր` մանուշակագույն լավա է ժայթքում։ Հրաբխի խառնարանի խորությունը 200 մետր է։ Խառնարանի ընդերքում գտնվում է ծծմբական թթվի` աշխարհի ամենամեծ լիճը։
Արևի ծագելուն պես խառնարանի խորքերից ջերմություն է բարձրանում։ Հեղուկ ծծումբը, որ հոսում է լճի եզրերով, բարձր ջերմության ազդեցությամբ մանուշակագույն բոցեր է արձակում։
Այստեղ ծծմբի հանքեր կան, որտեղ հանքափորներն ահավոր պայմաններում են աշխատում, նրանք ոչ մի հարմարանք և անվտանգության ոչ մի երաշխիք չունեն։ Հանքափորներն սպասում են այնքան, մինչև հրաբխից առանձնացած ծծումբը հոսի ձեռնափոր անցքերով։ Նրանք կուտակված ծծումբը հավաքում են զամբյուղների մեջ և ձեռքով դուրս հանում խառնարանից` այս ծանր աշխատանքի համար գրոշներ ստանալով։
Արտաքուստ գեղեցիկ այս վայրն այցելելն այդքան էլ հեշտ չէ։ Ծծմբից այնտեղ ահավոր գարշահոտություն է տիրում, իսկ քամու հետևանքով օդ բարձրացված գազերը ներթափանցում են թոքեր և խիստ վտանգավոր են առողջության համար։ Իսկ թե ինչպես են այս պայմաններում առանց կանխարգելիչ որևէ միջոցի աշխատում հանքափորները, այդպես էլ մնում է անբացատրելի։
Մանուշակագույն լավան 2008թ. առաջին անգամ լուսանկարել է Օլիվիե Գրյունվալդը։