Ուզբեկստանի առաջին փոխվարչապետ, ֆինանսների նախարար Ռուստամ Ազիմովն իր աշխատասենյակում է, այս մասին Ria-ին հայտնել են նախարարության ընդունարանում:
Ուշ երեկոյան լրատվամիջոցները գրեցին, որ Ազիմովը տնային կալանքի տակ է այն պահից, երբ լուրեր տարածվեցին, որ Ուզբեկստանի նախագահ Իսլամ Քարիմովը
մահացել է:
Ազիմովը 2000-ից զբաղեցնում է առաջին փոխվարչապետի պաշտոնը, իսկ 2005-ից նաև ֆինանսների նախարարն է:
Նշվում է, որ Ազիմովը Քարիմովի հնարավոր իրավահաջորդների թվում էր:
Հիշեցնենք` լրատվամիջոցները երեկոյան հայտնել էին, որ կյանքի 79-րդ տարում Տաշքենդում մահացել է Ուզբեկստանի նախագահ Իսլամ Քարիմովը: Նա հիվանդանոց էր տեղափոխվել օգոստոսի 29-ի կեսօրին` գլխուղեղի կաթվածի պատճառով ու գտնվում էր վերակենդանացման բաժանմունքում: Նախագահի աշխատակազմից Ria-ի աղբյուրը, սակայն, չէր հաստատել նրա մահվան մասին լուրը: Interfax-ի աղբյուրները նշել էին, որ նախագահի վիճակը բժիշկները գնահատում են կայուն: Ուզբեկստանում ՌԴ դեսպանատնից էլ փոխանցել էին, որ ոչ հերքում, ոչ հաստատում են տեղեկատվությունը:
Այս պահին ևս պաշտոնական տեղեկատվություն չկա Քարիմովի մահվան մասին: