Թերթերի տեսություն

«Հայկական ժամանակ»-ը գրում է. «Սասնա ծռեր» խմբի անդամները ՀՀ ոստիկանության պարեկապահակային գնդի տարածքում հայտնաբերվել են գաղտնի ցուցակներ, որոնցում գրանցված են 146 ենթադրյալ գործակալ և 35 մարմնավաճառությամբ զբաղվող:
     Այս մասին նշվում էր Հիմնադիր խորհրդարանի կողմից այսօր տարածված հայտարարությունում: Նույն հայտարարության շրջանակներում ՀԽ անդամներն այդ տվյալների համադրությամբ կասկածներ էին հայտնում, որ այդ տարածքում գտնված ՊՊԾ գնդի սպաները զբաղվել են կավատությամբ:
     ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանին խնդրեցինք պարզաբանել, թե ինչ ցուցակների մասին է խոսքը:
     «ՊՊԾ-ի լիազորություններից մեկը հենց մարմնավաճառության կանխարգելումն է, և շատ բնական է ու նորմալ, որ նման անձանց հաշվառում է վարվել և ցանկ է հայտնաբերվել: Այնտեղ որեւէ տարօրինակ կամ զարմանալի բան չկա»,- ի պատասխան մեր հարցին ասաց Ահարոնյանը՝ հավելելով, որ իրենք իրենց լրատվական թողարկումներում մարմնավաճառության թեմային անդրադառնալիս մշտապես հղում են անում պարեկապահակային ծառայությանը, որովհետև այդ ծառայությունն է իրականացնում կանխարգելիչ աշխատանքները:
     Մանրամասները` թերթի համարում: