Մի քանի կարևոր նախապայման արյունահեղություն թույլ չտալու համար
Դե եթե տեխնիկական, ուրեմն տեխնիկական.
Բոլորիս շահերից է, որ Սասնա Ծռերը ողջ և առաղջ մնան, քաղաքացիներն էլ անվնաս` իշխանության համար աշխատող թե նրանց դեմ բողոքող, ուրեմն
Իշխանությունն այս վերջին պայմանավորվածությունից հետո, բացի բուն քաղաքական բանակցություններին անցնելը է.
1. Կանոնավոր, բավարար և անվտանգ սնունդ, ջուր, դեղորայք և բժշկական ծառայություն մատակարարել նրանց: Այդ ամենը սկսել անել ոչ թե շատ հարգելի մարդկանց միջոցով, այլ Կարմի Խաչի միջոցով:
2. Չխոչընդոտել հեռախոսակապի և ինտերնետային կապի մատակարարումը այդ տարածքում:
3. Չխոչընդոտել ԶԼՄ-ների ելումուտը այդ տարածք և ոչ գաղտնի շփումները ապստամբների հետ:
4. Փոխել հարուցված քրեական գործի հիմքերը այնպես, որ այդ հոդվածներում «ահաբեկչություն» բառը չլինի:
5. Բացառել իշխանությունների կողմից զինյալների մասին որևէ բանավոր կամ գրավոր խոսքում «ահաբեկիչ» բառի կամ դրա ուղիղ հոմանիշների օգտագործումը, իշխանություն ունեցող մարդկանցից` այդ բառն օգտագործողներին պատասխանատվության ենթարկել ինչ-որ ողջամիտ եղանակով:
6. Անհապաղ դադարեցնել զինյալների հարազատների, մերձավորների, հարազատների, ընկերների և համախոհների նկատմամբ ահաբեկչական գործողությունները և վարքը ոստիկանության և հատուկ ծառայությունների բացահայտ և ծպտյալ գործակալների կողմից, ազատ արձակել այդ մոտիվներով արդեն ձերբակալվածներին, երբ հիմքերը «զինյալների հետ կապ պահպանելն է և նրանց աջակցությունը» ձևակերպումներն են կամ համանման հիմարաբանություններ: (Այլապես այդ պատճառաբանությամբ որոշ չնչին բացառություններով պիտի ձերբակալել հայ ժողովրդին, ծավալի մեջ գուցե մի քիչ սխալվում եմ, բայց դա հիմա էական չէ):
7. Անհապաղ սկսել ցուցարարների նկատմամբ ապօրինաբար, բիրտ և անհամաչափ ուժ և բռնություններ ձեռնարկած ոստիկանների և նրանց գործակալների հանցագործությունների հետաքննությունը` (1) հարուցելով քրեական գործ, և (2) ազատ արձակելով այդ հարձակումների դեմ ինքնապաշտպանական միջոցների դիմած ցուցարներին և քաղաքացիներին:
8. Որևէ կերպ չխոչընդոտել փաստաբանների և ԶԼՄ-ների օրինական գործունեությունը:
9. Որևէ կերպ չխոչընդոտել և սատարել քաղաքացիների խաղաղ կամարտահայտման խմբային և զանգվածայհին գործողությունները:
Առայժմ, այսքանը կարծես: Սրանք այն ամենահասարակն են, որ կարող են անել իշխանությունները իրադրությունը չբարդացնելու համար: Իշխանությունները պարտավոր են կատարել այս բաները այլապես սրանց չկատարելուց իրադրությունը հետզհետե բարդանում է կանխատեսելի սցենարներով:
Գլխավորը մնում է գլխավոր, ինչ պահանջել են Սասնա Ծռերը և հանրությունը: Այս պահանջները տարիներ շարունակ են հնչել, հազարավոր անգամներ.
1. Հայաստանում քաղաքական բանտարկյալներ չպիտի լինեն:
Իշխանությունը պարտավոր է վերանայել իր դիրքորոշումը եւ հանրության կողմից քաղաքական բանտարկյալներ համարվող մարդկանց համարել որպես քաղաքական բանտարկյակլներ, ապա ազատ արձակել նրանց, հետն էլ ներողություն խնդրել նրանցից, փոխհատուցելով նրանց զրկանքները:
2. Հայաստանի իշխանությունը պիտի հրաժարական տա:
Սա ես տառացի չեմ հասկանում, պիտի լինեն ողջամիտ և որակյալ բանակցություններ և գտնվեն լուծումներ անօրեն իշխանության հեռացման և օրինական իշխանության ձևավորման համար:
Գլխավոր բանակցային այս զույգ առարկաները դեռ իշխանությունները չեն քննարկել: Անհապաղ հարկավոր է սկսել այդ բանակցությունները, որքան էլ ոմանք դա նվաստացուցիչ համարեն իշխանության համար: Ժամանակը քիչ է, չկա ժամանակ եթե կուզեք, Հայսատնի առաջ միայն այս դարդը չի ծառացած, չթվեմ: Հակառակ դեպքում իշխանության արածը գնահատվելու է դիտավոր և հանցավոր անգործություն, որը, ինչքան կռահում եմ բերելու է մարդկային և նյութական անվերականգնելի կորուստների. Սասնա Ծռերը չեն պատրաստվում զենքը ցած դնել, այդպես եմ հասկանում: Իշխանությունը առայժմ այս հիմնահարցերի շուրջ չի բանակցում ու չի հայտարարում, թե չի բանակցելու: Այս հնարքը` համեմված Ս.Սարգսյանի կոշտ, սպառնալից, գուցե բլեֆով համեմված հայտարարության հետ, խնդիրները չեն կարգավորում: Խնդիրները չեն կարգավորի, եթե անգամ իշխանության հաջողվի բոլոր զինյալներին ձերբակալել, բանտարկել, կամ գնդակահարել:
ՀԳ.
Ներողություն անհամեստության համար. պատրաստ եմ ցանկացած միջնորդական, բանակցային գործերում ներգրավվել, եթե կկամենան կողմերը: Չեն կամենա` չեն կամենա.«Մենք լե մզի խմար պետություն ինք», ասում էր մշեցի ընկերս, ու մեր պետությունը կիսում է զինյալների պահանջները, որ կրկնել ենք հարյուրավոր անգամներ եւ տարիներ ի վեր: