Նախաձեռնությունը պահանջում է կարգալույծ անել Արամ արքեպիսկոպոս Աթեշյանին
 «Պետք է կախակայել Արամ Աթեշյանի գործունեությունը» հասարակական-քաղաքացիական նախաձեռնության անդամներն այսօր, լրագրողների հետ զրույցում, հայտարարել են, որ իրենց գլխավոր նպատակը Արամ արքեպիսկոպոս Աթեշյանին կարգալույծ անելն է: «Մենք արդեն նամակով դիմել ենք Ամենայն հայոց կաթողիկոս Գարեգին Բ-ին, Մեծի տանն Կիլիկիո Արամ Առաջին կաթողիկոսին՝ պահանջելով Աթեշյանի գործունեությունը կախակայելու հարցն անպայման մտցնել Գերագույն հոգևոր խորհրդի եռօրյա ժողովի օրակարգ: Կախակայման պատժին պետք է հաջորդի նրան կարգալույծ անելու հարցը»,-ասել է նախաձեռնության անդամ Գոհար Արշակյանը: Նրա խոսքով` Աթեշյանի արարքն ապտակ էր ողջ առաջադեմ հանրությանը, ոչ միայն հայերին, անգամ Թուրքիայի առաջադեմ հանրությանը: «Նա ապացուցեց, որ 101 տարի է անցել Ցեղասպանությունից, սակայն հայը Թուրքիայում մնացել է նույն վախկոտը»,-ասել է Արշակյանը: Աթեշյանի պահվածքն այլևս անհանդուրժելի է և արժանի է խստագույն պատժի՝ իր հերթին նկատել է նախաձեռնության մեկ այլ անդամ` Սոսե Ղլեջյանը: |
