Իրադարձություններ

     Հայաստանի և Ռուսաստանի միջև հակաօդային պաշտպանության միավորված տարածաշրջանային համակարգ ստեղծելու համաձայնագրի քննարկման ժամանակ, դիմելով Պաշտպանության փոխնախարար Արա Նազարյանին, ՀԱԿ խմբակցության պատգամավոր Լյուդմիլա Սարգսյանը պարզաբանում խնդրեց. «Շատերը մտածում են, որ հայ-ադրբեջանական բախման դեպքում, եթե Ռուսաստանն ունի հակադարձ կարծիք, ապա մենք այդ ՀՕՊ համակարգը կիրառելու հնարավորություն չենք ունենա, ի՞նչ կասեք սրա հետ կապված»:
     «Համաձայնագրի դրույթները չեն տարածվում Արցախի վրա: Արցախի մասով մենք ունենք մեր հակաօդային պաշտպանության միջոցները. ռազմական դոկտրինով ՀՀ-ն հանդիսանում է Արցախի անվտանգության ապահովման երաշխավորը»,- ասաց փոխնախարարը:
     Լյուդմիլա Սարգսյանը շարունակեց. «Եթե պատերազմական իրավիճակ է ու Արցախում հակաօդային պաշտպանության խնդիր ունենք, ըստ համաձայնագրի, սա սահմանափակո՞ւմ է մեր հնարավորությունը համակարգն օգտագործելու համար»:
     «Համաձայնագիրը որևիցե հարցով չի սահմանափակում մեր հակաօդային պաշտպանության միջոցների կիրառումը»,- եզրափակեց ՊՆ պաշտոնյան:
     ԱԺ փոխնախագահ Շարմազանովն էլ իր հերթին արձանագրեց, որ ՀՀ ԶՈՒ-ն անկախ ու ազատ է լինելու Արցախում պաշտպանական ցանկացած գործողություն իրականացնելու համար: