Իրադարձություններ

     Այս օրերին մեր հավաքականն ԱՄՆ-ի Լոս Անջելես քաղաքում նախապատրաստվում է Գվատեմալայի և Էլ Սալվադորի հետ ընկերական հանդիպումներին։ Երեկ կայացած մարզումից հետո մեր հավաքականի ավագ Հենրիխ Մխիթարյանը հանդիպել է Բրազիլիայի ազգային հավաքականի և Լոնդոնի «Չելսի»-ի ֆուտբոլիստ Վիլյանին, ում թիմը՝ Բրազիլիայի ընտրանին նույնպես ուսումնամարզական հավաք է անցկացնում Լոս Անջելեսում։ «Սթաբհաբ Սենթր» մարզադաշտի ենթատրիբունային տարածքում Մխիթարյանը հանդիպել է Դոնեցկի «Շախտյոր»-ի իր թիմակցին։ Ավելի ուշ նրանց հանդիպման լուսանկարն է հրապարակվել, որի վրա երևում է, որ Մխիթարյանի ոտնաթաթը փաթաթված է սառույցով։ Լոս Անջելեսում իր նախկին թիմակիցներին է հանդիպել նաև «Փյունիկ»-ի նախկին ֆուտբոլիստ Արթուր Աղասյանը։ Նա լուսանկար է հրապարակել Դավիթ Մանոյանի, Էդգար Մանուչարյանի և Հենրիխ Մխիթարյանի հետ: Այդ լուսանկարում նույնպես երևում է, որ Հենրիխի ոտքը վնասված է։ Մխիթարյանի վնասվածքի և առաջիկա հանդիպումներին մասնակցելու շուրջ որևէ պաշտոնական տեղեկություն չկա։