«ՌԴ ԱԳ նախարար Լավրովն արդեն արձագանքեց մեր նախագահի ասածին: Նա նշեց, որ Ռուսաստանը կողմ է հետաքննութան և վստահության մեխանիզմների ներդրմանը, նշեց, որ խնդիրը չունի ռազմական լուծում: Իսկ Լավրովը երբ խոսում է, խոսում է ոչ միայն ՌԴ ԱԳ նախարար, այլև համանախագահ երկրներից մեկի ԱԳ նախարար: Իսկ սա նշանակում է, որ հայկական կողմերի առաջարկները ընդհանուր առմամբ Մինսկի խմբի համանախագահ երկրների մոտ ունեն դրական ընկալում»,- այսօր ՀՀԿ ԳՄ նիստից հետո լրագրողների հետ զրույցում` անդրադառնալով Սերժ Սարգսյանի կողմից բանակցությունները վերսկսելու երեք պայմաններին աշխարհի արձագանքին, ասել է ՀՀԿ խոսնակ, ԱԺ փոխնախագահ Էդուարդ Շարմազանովը:
«Ազգերի ինքրոշումը ՄԱԿ-ի նպատակներից մեկն է, և որևէ մեկը չի կարող Լեռնային Ղարաբաղի ժողովրդին բացատրել, թե ինչու Արևելյան Թիմորի ժողովուրդը 1999 թվականին ՄԱԿ-ի հովանու ներքո պետք է կատարի ռեֆերենդում և առանձնանա Ինդոնեզիայից, իսկ ԼՂ ժողովուրդը, որ 91 թվականին իրականացրել է ռեֆերենդում, անջատվել է ԽՍՀՄ-ից, չի կարող իրականացնել և ռեֆերենդումի միջոցով անկախանալ: Որևէ մեկը չի կարող ԼՂ ժողովրդին բացատրել, թե ինչու Կոսովոյի բնակիչներն ավելի շատ ինքնորոշվելու իրավունք ունեն, քան ԼՂ ժողովուրդը: Դրա համար մենք քայլ առ քայլ գնալու ենք դեպի այդ ճանապարհը»,- ասել է Շարմազանովը: