Իրադարձություններ

Ապրիլի 30-ը ջազի համաշխարհային օրն է: Երևանում է աշխարհահռչակ ջազմեն ու բաս կիթառահար Ռիչարդ Բոնան, ով լրագրողների հետ հանդիպման ժամանակ հասցրել է խոստովանել, որ Երևանն իրեն անչափ դուր է գալիս:

Նա նշեց, որ թեև այդքան էլ լավ ծանոթ չէ հայկական մշակույթին, սակայն իմանալով, թե ինչի միջով անցել է Հայաստանը, հայ ժողովրդին համարում է շատ քաջ, առաջին հերթին՝ հոգեպես: «Դա արտացոլված է երաժշտության մեջ, որով հայ ժողովուրդը փորձում է ինքնաարտահայտվել: Հայաստանում ստեղծագործելու համար ներշնչանքի աղբյուր եմ համարում հենց ազգային գործիքների հնչողությունը: Այսօր սովորելու եմ նվագել դուդուկ, և որոշել եմ հաջորդ ալբոմում պարտադիր ընդգրկել այդ գործիքը»,- անկեղծացավ երաժիշտը:

Նշենք, որ այսօր` ապրիլի 30-ին Կասկադում կկայանա «Ջազը հանուն համամարդկային արժեքների» խորագրով բացօթյա համերգը, որի ընթացքում ելույթ կունենան հայ և աշխարհահռչակ ջազմեններ: Նրանց շարքում կլինեն Լևոն Մալխասյանը, Արմեն Թութունջյանը, Երվանդ Երզնկյանը, Կարեն Մամիկոնյանն իր «Birds» խմբի հետ, ինչպես նաև Ռոբերտո Կել Տորեսը և աշխարհահռչակ ջազմեն ու բաս կիթառահար Ռիչարդ Բոնան:
     «Երևանը մշակութային հարուստ քաղաք է, և ուրախ եմ, որ ջազի օրը նշելու ենք միասին: Համերգի ժամանակ սպասվում են անակնկալներ»,- ասել է Ռիչարդ Բոնան: