Ամերիկյան Apple կորպորացիան պատրասվում է առաջիկայում սմարթֆոնների և պլանշետների իր նոր մոդելները վաճառքի հանել: Այս մասին գրում է 9to5mac-ը:
Աղբյուրը նշում է, որ ընկերության սմարթֆոնների և պլանշետների նոր մոդելների շնորհանդեսը տեղի է ունենալու այս տարվա մարտի 15-ին, որից ընդամենը երեք օր անց` մարտի 18-ին, կորպորացիան նոր արտադրանքները վաճառքի է հանելու:
Նշվում է, որ ընկերությունը մասնավորապես պատրաստվում է ներկայացնել 4 դյույմ անկյունագծով դիսփլեյով iPhone 5se սմարթֆոնն ու iPad Air 3 պլանշետը:
Ընկերության ներկայացուցիչները նշել են, որ սմարթֆոնի այս մոդելը ընկերության կողմից արտադրված iPhone-ների այն սիրահարների համար է նախատեսված, ովքեր ցանկանում են iPhone 6s-ի ու iPhone 6s Plus-ի նման արդյունավետ, սակայն չափերով ավելի փոքր սմարթֆոններ ունենալ: Այսինքն` չափերով iPhone 5se-ն նման կլինի iPhone 5s-ին, սակայն ավելի հզոր կլինի։ Սմարթֆոնը ներկայացվելու է 4 գույներով՝ ոսկեգույն, վարդագույն, արծաթագույն և մոխրագույն։
Ինչ վերաբերում է նոր պլանշետին, ապա նշվում է, որ այն հագեցած է լինելու ավելի պայծառ պատկերներ ստանալու համար նախատեված կատարելագործված տեսախցիկով: