ԱՄՆ Կենտրոնական հետախուզական վարչության ղեկավար Ջոն Բրեննանը BBC հեռուստաալիքին տրված հարցազրույցի ժամանակ հայտարարել է, որ ԴԱԻՇ ահաբեկչական խմբավորման զինյալները քիմիական զենք ստեղծելու անհրաժեշտ միջոցներ ունեն: Ավելին, Բրեննանը նշել է, որ ծայրահեղական ահաբեկիչներն արդեն մի քանի անգամ քիմիական զենք են կիրառել Սիրիայի և Իրաքի տարածքում:
«Մեզ հայտնի է իսլամիստ ծայրահեղականների` մարտի դաշտում հակառակորդի դեմ քիմիական զենք կիրառելու մի քանի դեպքեր»,- հայտարարել է Բրեննանը:
ԱՄՆ Կենտրոնական հետախուզական վարչության ղեկավարը նշել է նաև, որ ԴԱԻՇ-ի ահաբեկիչները, հնարավոր է, հետագայում իրենց ստեղծած քիմիական զենքն արևմուտք արտահանելու փորձեր անեն` դրա դիմաց ֆինանսական լուրջ միջոցներ ստանալու ակնկալիքով: «Հենց այդ պատճառով էլ անհրաժեշտ է վերահսկողության տակ պահել բոլոր այն ուղիները, որոնց միջոցով ահաբեկիչ զինյալները մաքսանենգությամբ են զբաղվում»,- նշել է Բրեննանը: