Անիի Տիգրան Հոնենց եկեղեցու պատկանելիության հարցով ստորագրահավաք է սկսվել
Գյումրիի Քանդակագործության Ազգային պարկ թանգարանն իր մտահոգությունն է հայտնել Անիի Տիգրան Հոնենց եկեղեցու պատկանելիության վիճարկման վերաբերյալ։ Թանգարանն ստորագարահավաք է կազմակերպել change.org կայքում և կոչ-հայտարարությամբ դիմել Թուրքիայի մշակույթի նախարարությանն ու ամբողջ աշխարհի մտավորականությանը. Հայտարարելով Անին մշակութային բազմազանության պատմական տարածք՝ Թուրքիան շեղում է միջազգային հանրությանը բուն հայկական պահանջներից և դրանով իսկ ստեղծում պահանջի չեղարկման միջավայր: Սակայն մեզ համար հատկապես մտահոգիչ է եկեղեցու վերակագնման ընթացքում այն քաղկեդոնական հայտարարելը և դրանով իսկ վրաց-հայկական դարավոր բարեկամության մեջ վիճաբանությունների ու մշակութային հակամարտության հրահրումը: Մենք պահանջում ենք ոլորտի թուրքական պատասխանատու կառույցներից. - զերծ մնալ եկեղեցու պատմական պատկանելիության շուրջ հայտարարություններից, - եկեղեցու մոտակայքում տեղադրված ցուցանակում նշել «հայկական քրիստոնեական եկեղեցի» անվանումը, - ավարտին հասցնել և այս փուլով չամփոփել եկեղեցու գմբեթի շինարարությունը՝ հայտարարելով հետագա աշխատանքների ընթացքն ու նպատակները, - զերծ մնալ Վրաստանի և Հայաստանի միջև մշակութային հակամարտության հարահրումից: Խնդիրը ՀՀ-ում հասարակական լայն հնչեղություն է ստացել վերջերս տեղադրված ցուցանակի պատճառով, որը եկեղեցին ներկայացվում է որպես վրաց քաղկեդոնական: Վստահ ենք, որ մեր վրացի եղբայրներն այս հարցում ունեն բարեկամական մոտեցում և պատմական արդարության վերակագնման համար պատրաստ են մասնագիտական և հանրային քննարկումների ու երկխոսության: Մենք ապրում ենք մի տարածաշրջանում և երկխոսությամբ կարող ենք լուծել ցանկացած խնդիր՝ դեմքով այդ խնդիրներին դառնալու դեպքում»: |