Ազգային ժողովում այսօր տեղի է ունեցել Հանրապետական խմբակցության նիստը, որտեղ քննարկվել է Մարդու իրավունքների պաշտպանի թեկնածուի հարցը:
Ի վերջո, ՀՀԿ խմբակցությունը որոշում է կայացրել ՄԻՊ-ի թեկնածու առաջադրել Արդարադատության փոխնախարար Արման Թաթոյանին, ով նույնպես մասնակցում էր այդ քննարկմանը:
MAMUL.am-ի թղթակցի այն հարցին` արդյոք ինքը համաձայնվե՞լ է իր թեկնածության առաջադրմանը, Թաթոյանը պատասխանել է. «Այո, համաձայնվել եմ, իմ թեկնածությունն առաջադրեց Հովհաննես Սահակյանը: Համոզված եմ, որ կարող եմ անկաշկանդ լինել և աշխատել օմբուդսմենի առջև դրված խնդիրներին համարժեք»:
Վերջինը տեղեկացրել է, որ տարիներ շարունակ աշխատել է ՄԻՊ-ի գրասենյակում և պատկերացնում է իր աշխատանքը:
«Ընդամենը առաջադրված եմ որպես թեկնածու, հանձնաժողովում դեռ քննարկումներ կլինեն, այդ հարցերը այնտեղ կքննարկենք»: