«Էդ աղջիկը գիշերներն աշխատում էր, առավոտյան գալիս դասի: Ինքնուրույն վաստակում էր իր ուսման վարձն ու սովորում: Նորմալ աղջիկ էր, բացասական բան էդ մարդու հասցեին կարծում եմ՝ ոչ մեկը չի կարող ասել»,- ՄԱՄՈՒԼ.am լրատվականի թղթակցի հետ զրույցում` խոսելով օրեր առաջ ԱԱԾ-ի կողմից վնասազերծված խմբի անդամներից Նելլի Մինասյանի մասին, ասաց «Գլաձոր» համալսարանի ռեկտոր Ժորա Ջհանգիրյանը:
Ռեկտորը նշեց, որ ինքը նույնպես դասավանդել է Նելլիին. «Ակտիվ ուսանող չէր: Գլաձորյան միջոցառումներին ակտիվ մասնակից չի եղել: Բացակայության հարցում էլ ակտիվ չէր»:
Հարցին` անակնկա՞լ չէր Նելլիին զինված խմբի կազմում տեսնելը, Ժորա Ջհանգիրյանը պատասխանեց. «Ի՞նչ, սպասում էիք, որ կարող է էդ աղջիկն ինչ-որ բանի մեջ մեղադրվե՞լ: Բոլորդ զբաղված եք միայն Նելլիով, մյուսները ձեզ չեն հետաքրքրում, միայն Նելլին է ձեզ հետաքրքրում: Գնացեք, մյուսների ով լինելը պարզեք»,- եզրափակեց նա:
Հիշեցնենք՝ նոյեմբերի 25-ին, ըստ ԱԱԾ
հաղորդագրության, Երևանում զինված խմբավորում է վնասազերծվել, որը նպատակ է հետապնդել ՀՀ տարածքում կազմակերպել ծանր հանցագործություններ: