Հայաստանը` ռուսական քաղաքական խնդիրների կիզակետում. Արամ Կարապետյանի դիտարկումները
 Հայաստանում տիրող ներքաղաքական իրավիճակի, ինչպես նաև` արտաքին խնդիրների շուրջ ՄԱՄՈՒԼ.am-ի թղթակիցը զրուցել է «Նոր ժամանակներ» կուսակցության նախագահ, քաղաքագետ Արամ Կարապետյանի հետ: - Պարո´ն Կարապետյան, ռուսական Սու–24–ը խփելուց հետո կարծիքներ հնչեցին, որ այսուհետ Հայաստանը Ռուսաստանի թիվ մեկ դաշնակիցն է, քանի որ հայտնվել է Ռուսաստանի և Թուրքիայի արանքում: Եթե այդպես է, ըստ Ձեզ, ի՞նչ է սպասվում Հայաստանին: - Նախ նշեմ, որ իմ կարծիքով, դա պլանավորված ակցիա էր: Նման դեպքում Թուրրքիան միայնակ գործել չէր կարող, քանզի շատ լավ հասկանում է, որ կունենա ամեն տեսակի կորուստներ` թե´ տնտեսական, թե´ քաղաքական, թե´ ռազմական ասպարեզներում: Պարզ է, որ Թուրքիան ինչքան էլ ուժեղ բանակ ունենա և այլն, ռազմական բախման մեջ կպարտվի Ռուսաստանին: Դա փաստ է: Ուստի, ես կարծում եմ, որ Թուրքիան այդ պրովոկացիան արել է` ինչ-որ տեղ ունենալով աշխարհի կամ երկրների հովանավորչությունը: - Ինչո՞ւ եք այդպես կարծում: - Հարցը նրանում է, որ կատարվածը զուտ մի բանի համար էր: Տեսեք` Վրաստանում ռուսական ռազմական գործողություններին աշխարհը չպատասխանեց, Ուկրաինայում` Ռուսաստանի ռազմական գործողություններին նույնպես աշխարհն անհաղորդ մնաց: Պետությունները, ինչ-որ առումով, զերծ մնացին նույնիսկ այն պարագայում, երբ որ զորքերը մտցվեցին, իրենց ասելով, Դոմբաս և այլն: Որպեսզի կանգնեցնեն Պուտինին` փորձեցին և արեցին դա: Այսինքն` առաջին անգամ Արևմտյան մի հատված, Թուրքիայի միջոցով, կատարեց քայլ: Ասաց` մենք պատրաստ ենք ռազմական քայլերի: Հիմա` ինչո՞ւ Հայաստանը դարձավ ռուսական քաղաքական էլիտայի համար կիզակետ: Որովհետև Թուրքիային պատասխանելու գործիքները շատ քիչ են, կա´մ պիտի պատերազմել հետը, որը քիչ հավանական է, որովհետև ՆԱՏՕ-ի երկրի դեմ պատերազմ է վերջիվերջո, կա´մ պիտի կիրառել դիվանագիտական, տնտեսական և այսպես ասած` հոգեբանական փիառի քայլեր, որոնք արդեն կատարվում են` դիվանագիտականը սկսվել է, տնտեսականը` գնում է, իմ տեղեկությամբ` նաև սանկցիաներ է Ռուսաստանը կիրառելու Թուրքիայի նկատմամբ, որը բացեիբաց անելու է: Բոլորն անխտիր, ովքեր վերջերս ասում էին, թե Թուրքիայի հետ եղբայրություն պետք է անել, նրանք, ովքեր ասում էին` Ադրբեջանն ավելի լավն է, քան Հայաստանը, հիմա հատուկ հրահանգով սկսել են օգտագործել հայկական փաստարկները` Թուրքիայի դեմ, որովհետև այլ փաստարկներ չկան: Կիրառվելու են փաստարկներ, որոնք Թուրքիայի համար զգայուն են ոչ թե քաղաքական, այլ հոգեբանական հողի վրա: - Ուշագրավ է նաև այն հանգամանքը, որ ինքնաթիռը խփելուց հետո Ռուսաստանում հանկարծ հիշեցին, որ 1915թ. տեղի է ունեցել հայերի ցեղասպանություն: Այսօր շատ ռուս քաղաքական գործիչներ արդեն քննարկում են Հայաստանի կողմից Արևմտյան Հայաստանը ազատագրելու հարցը: Ձեր կարծիքով, սա ինչի՞ն է միտված: Թե՞, իսկապես, նրանք մտահոգված են հայերի ապագայով: - Եթե ճշմարտությունն ասենք` այնպես չէ, որ ռուսները Հայոց ցեղասպանության մասին չեն խոսել, չեն դատապարտել: Դա է վկայում նաև Պուտինի վերջին այցը Հայաստան` Ցեղասպանության 100 ամյակին: Հիշել են 1995-ին, ես մասնակից եմ եղել… Նրանք առաջին գերտերություններից մեկն էին, որ խոսեցին այդ մասին: Նույնը Ֆրանսիայի առումով կարող եմ ասել: - Ինչո՞ւ է ուրեմն, վերջինների կողմից, այս օրերին, այսքան ակտիվորեն շահարկվում հայկական գործոնը: - Որովհետև այլ գործոններ չկան` քրդերն են, հայերն են և տնտեսական պատժամիջոցներն են : Դրա համար, իրենք այդպես ակտիվորեն` կապված ինչ որ գործողությունների հետ, միտումնավոր բաներ են ասում: - Հայերին իրենց գործողություններում ներգրավելու նպատակո՞վ: - Ոչ թե ներգրավելու, այլ, առաջին հերթին, ենթադրում եմ, թուրքերի ռեակցիան տեսնելու համար: Մենք չպետք է թույլ տանք մեզ օգտագործեն, որովհետև պատրաստ չենք դրան: Ցավոք սրտի, վերջին 20 տարվա մեջ, եթե պատրաստված լինեինք ամեն ինչով` տնտեսապես, սոցիալապես, ռազմական, հետախուզական ոլորտներում, հիմա հնարավոր է այդ խաղերին ելևէջներ տայինք, բայց քանի որ ոչ մի բանի պատրաստ չենք, երկիրը մինչև վերջնահատակ քանդել ենք, ուստի պետք է, որքան հնարավոր է, հեռու մնանք նման արկածախնդրությունից, տուրք չտանք դրան: Իրենք ինչքան ուզում են, թող խոսեն: - Պարոն Կարապետյան, ԱԱԾ-ի կողմից վնասազերծման վերջին գործողություններից հետ, ըստ Ձեզ, Հայաստանում ներքին ինչպիսի՞ զարգացումներ են սպասվում: - Այն ամենն, ինչ ես տեսա և այն բացատրությունները, որ ես լսեցի` հասկացա, որ սա բեմականացում է` ուղղված զուտ այն նպատակի համար, որպեսզի ցույց տան, որ Հայաստանի ԱԱԾ-ն երկրում վերահսկում է իրավիճակը, որ որևէ խնդիր չկա, Հայաստանը անվտանգ երկիր է, եթե Սերժ Սարգսյանը ժամանակին չլիներ ԱԱԾ-ի ղեկավար, հիմա բոլոր շենքերը պայթեցրած կլինեին… - Հանցախմբի կազմը կասկածանք չի՞ առաջացնում: - Ոչ , որովհետև սա միտված է արտաքին աշխարհին ցույց տալու համար, թե ինչքանով է պատրաստ Հայաստանի ԱԱԾ-ն հակաահաբեկչական գործողություններին: Եթե նկատել եք, բոլոր այն ահաբեկչությունները, որոնք որ եղել են աշխարհի տարբեր երկրներում` իսլամական, անպայման կան տղամարդիկ և կանայք, և բոլոր տեղերում լինում են, այսպես ասած` գյուղական ինտիլիգենցիայի ներկայացուցիչներ: Կա մարդ, որը հեռուստատեսությունում է աշխատել, մարդ, որն ինչ-որ առումով կապված է եղել հաքերների հետ: Նման խմբերում այդպիսի մարդիկ ընդգրկվում են: Մերոնք էլ, այս սալյանկեն սարքել են, թե տեսեք` էսպիսի սալյանկա լինի` մենք կպայքարենք: |
